AQSH Bog‘dodning ruxsatisiz Iroqda reyd o‘tkazdi
Olam
−
22 noyabr 2023
7335Iroq hukumati AQSH Qurolli kuchlarining Bobil viloyatidagi ayrim nishonlariga hujumlar uyushtirgan harbiy kuchayishiga keskin norozilik bildiradi. Bu haqda mamlakat rasmiysi Basem al-Avadning bayonotiga tayanib, “Shafaq News” axborot portali xabar berdi.
“Biz AQSH harbiy-havo kuchlarining Iroq hukumati ma’muriyatining xabarisiz Jurf an-Nasr hududiga qilingan hujumini keskin qoralaymiz va bu hujumni Iroq suverenitetini qabul qilib bo‘lmaydigan buzish, deb bilamiz”, deyiladi bayonotda.
Ta’kidlanishicha, Iroq rasmiylari Amerika tomonining harakatlarini ichki barqarorlikni buzishga qaratilgan xavfli urinish deb biladi.
“AQSH boshchiligidagi xalqaro koalitsiya kuchlarining Iroqda bo‘lishi qurolli kuchlarimizni ISHID terrorchilik guruhiga qarshi kurashishga tayyorlash va o‘qitish bilan bog‘liq. Havo kuchlarining reydlari esa ushbu missiyani buzish hisoblanadi”, deyiladi bayonotda.
“Shafaq News” xabariga ko‘ra, 22 noyabrga o‘tar kechasi Amerika kuchlari Bobil viloyatidagi iroqlik qurolli guruhlar pozitsiyalariga hujum qilish uchun dronlardan foydalangan. Oqibatda iroqlik sakkiz nafar askar halok bo‘lib, ikki nafari yaralandi.
AQSH Markaziy qo‘mondonligi matbuot xizmati esa AQSH harbiylari Eron tomonidan qo‘llab-quvvatlanayotgan guruhlar hujumlariga javoban Iroqdagi nishonlarga zarba berilganini aytgan.
Ma’lumot uchun, 900 ga yaqin amerikalik askar Suriya hududida, 2,5 ming nafari esa Iroqda joylashgan. Pentagon ma’lumotlariga ko‘ra, 17 oktyabrdan buyon Suriya va Iroqdagi AQSH qo‘shinlariga 66 marta hujum qilingan.
Eslatib o‘tamiz, oldinroq Iroq shimolidagi Amerika va xalqaro kuchlar joylashgan harbiy bazaga uchuvchisiz samolyot hujum qilgandi. Eron Tashqi ishlar vaziri Husayn Amir Abdullohiyon esa harbiylar Falastin-Isroil mojarosi avj olishi fonida O‘rtayer dengiziga joylashtirilgan AQSH harbiy-dengiz kuchlari kemalarini ehtimoliy hujumlarga qarshi himoyasiz deb bilishini aytgandi.
LiveBarchasi