AQSH Gruziyaga qarshi yangi sanksiyalar kiritadi

Vashington ma’muriyati Gruziya hukumatiga qarshi yangi choralar, jumladan, qo‘shimcha cheklovlar joriy etishni rejalashtirmoqda. Bu haqda AQSH Davlat kotibi Entoni Blinkenning kecha, 4 dekabr kuni e’lon qilingan yozma bayonotida so‘z boradi.

“Qo‘shma Shtatlar hozirda biz ilgari e’lon qilgan ikki tomonlama hamkorlikni ko‘rib chiqishni davom ettirishdan tashqari, qo‘shimcha sanksiyalarni qo‘llashni o‘z ichiga olgan vositalardan foydalanishga tayyorlanmoqda”, deydi Amerika tashqi siyosat departamenti rahbari.

Uning fikricha, Gruziya hukumati “tinch yig‘ilishlar va o‘z fikrlarini bildirish huquqidan” foydalangani uchun hibsga olinganlarni “zudlik bilan ozod qilishi” kerak. Davlat kotibining fikricha, “noqonuniy kuch ishlatishda aybdor mansabdor shaxslar to‘liq javobgarlikka tortilishi kerak”.

“AQSH “Gruziya orzusi” partiyasining Gruziya fuqarolari, ommaviy axborot vositalari xodimlari va muxolifat vakillariga nisbatan asossiz zo‘ravonliklarini keskin qoralaydi. Biz “Gruzin orzusi”ni repressiv harakatlarini, jumladan, o‘zboshimchalik bilan hibsga olish va jismoniy zo‘ravonlikni to‘xtatishga, uni tanqid qilganlarning ovozini o‘chirishga chaqiramiz. Biz, ayniqsa, huquq-tartibot idoralari xodimlarining xatti-harakatlari tufayli odamlarning og‘ir tan jarohati olishi haqidagi xabarlardan xavotirdamiz”, deb ta’kidladi Blinken. 

Eslatib o‘tamiz, 28 noyabr kuni Gruziyada hukumatga qarshi namoyishlarning navbatdagi to‘lqini boshlangandi. Namoyishga mamlakat Bosh vaziri Irakliy Kobaxidzening bayonoti sabab bo‘ldi.

Uning so‘zlariga ko‘ra, hukmron “Gruziya orzusi – Demokratik Gruziya” partiyasi 2028 yil oxirigacha Yevropa Ittifoqiga qo‘shilish bo‘yicha muzokaralar masalasini kun tartibiga kiritmaslik va jamiyatning barcha byudjet grantlarini rad etishga qaror qilgan.

Hukumat rahbarining so‘zlariga ko‘ra, bunga Yevropa Ittifoqining unga qo‘shilish bo‘yicha muloqot boshlanishi borasidagi doimiy shantajlari, parlament tomonidan qabul qilingan bir qator qonunlarni bekor qilish talablari va Gruziya hukumatiga qarshi sanksiyalar qo‘llash chaqiriqlari sabab bo‘lgan.