AQSH “Hizbulloh”ga Isroil-Falastin mojarosiga aralashmaslikni maslahat berdi

AQSH Livandagi "Hizbulloh" jangarilarini Isroil va HAMAS o‘rtasidagi urushga aralashmaslikka chaqirdi. Bu haqda "The Times of Israel" xabar berdi.

"Hizbulloh" yoki boshqa davlat va nodavlat kuchlari davom etayotgan mojarodan o‘z manfaatlari yo‘lida foydalanmasligi kerak. Aks holda, 2006 yilgi Isroil va Livan o‘rtasidagi urushdan ham ko‘proq qon to‘kilishi mumkin. Qo‘shma Shtatlar mojarodan Livanning ham jabrlanishini istamaydi", degan nomini oshkor qilishni istamagan AQSHning xavfsizlik bo‘yicha yuqori martabali vakili.

Unga ko‘ra, 3 noyabr kuni "Hizbulloh" yetakchisi Hasan Nasrulloh G‘azo sektoridagi mojaro mintaqaviy urushga aylanib ketishining oldini olish uchun imkon qadar tezroq to‘xtatilishi kerakligini aytgan. Shunga qaramay, u guruh rahbariyati barcha variantlarni ko‘rib chiqayotganini va HAMAS harakati Isroilga hujum qilgach, "Hizbulloh" ham Isroilga qarshi jangga kirib, uning armiyasini G‘azo sektoridan chalg‘itganini ma’lum qilgan.

Avvalroq, “Hizbulloh” yetakchisi Shayx Hasan Nasrulloh AQSH rasmiylari G‘azo sektorida o‘t ochishni to‘xtatishga to‘sqinlik qilayotgani haqida gapirgandi.