Abituriyentlarga ruxsatnomalar berish boshlandi

2023-2024 o‘quv yilida oliy ta’lim muassasalarining bakalavriat ta’lim yo‘nalishlariga o‘qishga kirish uchun onlayn ro‘yxatdan o‘tgan abituriyentlarga “Abituriyent ruxsatnomasi”ni berish boshlandi. Bu haqda Bilimni baholash agentligi ma’lum qildi.

Abituriyentlar test sinovlarida ishtirok etish uchun “Abituriyent ruxsatnomasi”ni my.uzbmb.uz saytiga shaxsiy identifikatsiya raqami hamda pasport seriyasi va raqamini kiritgan holda olishlari mumkin.

Abituriyentlar test sinoviga pasport (ID-karta) va abituriyent ruxsatnomasi bilan belgilangan vaqtdan kechikmagan holda kelishlari lozim.

“Pasport nusxasi yoki boshqa hujjatlar bilan kelgan, shuningdek, kechikib kelgan abituriyentlar test sinovlariga kiritilmaydi”, deyiladi xabarda.

Eslatib o‘tamiz, avvalroq agentlik 2023-2024 o‘quv yili uchun oliy ta’lim muassasalariga kirish test sinovlari joriy yilning 1 avgust kunidan boshlanishini ma’lum qilgandi.