Ahmadaliyev Inoueni yutishiga uyimni tikaman – Xirn

O‘zbekistonlik professional bokschi Murodjon Ahmadaliyevning promouteri Eddi Xirn mijozi yaponiyalik mutlaq jahon chempioni Naoya Inoueni mag‘lub eta olishiga to‘liq ishonmoqda. Bu haqda Xirn “Matchroom Boxing”ga bergan intervyusida aytdi.

“Ushbu jang WBA tomonidan ikki marta qayd etilgan. Birinchi marta ular Murodjonni chetlab o‘tish uchun pul to‘lashdi. Jang o‘tkazilishi borasida ikkinchi marta qilingan buyruqdan ham Inoue jamoasi qochishni uddaladi. Ahmadaliyev Naoya Inoueni mag‘lub etadi. Buning uchun Murodjonda yetarlicha mahorat bor. “Yo‘q, Naoya hech kimdan qo‘rqmaydi”, deganlar ham bor. Inoue qo‘rqmasligi mumkin, lekin uning jamoasi bizdan qo‘rqadi, chunki boksdagi hamma Ahmadaliyevning qanchalik kuchli ekanligini biladi. Eng yaxshilar eng yaxshilar bilan jang qilsin. Bu diviziondagi yagona jang. Bu sport tarixidagi eng yaxshi janglardan biri bo‘ladi”, deydi Xirn.

Shuningdek, Xirn Murodjonning jangiga hatto uyini tikishga tayyorligini bildirdi. 

“Men Murodjon Naoyani yengishiga o‘z uyimni tikaman. Gudman bilan jangdan so‘ng Naoya  kamardan voz kechishi yoki jang qilishi kerak. Ishonchim komilki, ular jang qilish uchun chiqmaydilar. Agar ular buni qilsalar, uni eng yaxshi funt-sterling jangchisi deb aytmang, chunki bu odam uni mag‘lub etadi”, deydi Xirn.

Eslatib o‘tamiz, avvalroq WBA Inouening Sem Gudman bilan jangdan keyin Ahmadaliyev bilan to‘qnash kelishi borasida buyruq bergani xabar qilingandi.