7 oktyabrdan beri G‘azoda kamida 3195 bola halok bo‘ldi – Save the Children

G‘azoda atigi uch hafta ichida halok bo‘lgan bolalar soni 2019 yildan beri dunyo bo‘ylab mojaro zonalarida halok bo‘lgan bolalarning yillik sonidan oshib ketgan. Bu haqda Save the Children tashkiloti ma’lum qildi.

G‘azo va Isroil sog‘liqni saqlash vazirliklariga ko‘ra, 7 oktyabrdan beri 3257 dan ortiq bola, jumladan G‘azoda kamida 3195, G‘arbiy Sohilda 33 va Isroilda 29 bola o‘ldirilgan.

G‘azoda bor-yo‘g‘i uch hafta ichida halok bo‘lgan bolalar soni butun dunyo bo‘ylab – 20 dan ortiq mamlakatlarda – so‘nggi uch yil ichida qurolli mojarolarda o‘lganlar sonidan oshib ketgan.

G‘azoda o‘ldirilgan 7703 kishining 40 foizdan ortig‘ini bolalar, Falastin hududi va Isroilda halok bo‘lganlarning uchdan biridan ko‘prog‘ini tashkil etadi. G‘azoda yana 1000 nafar bola vayronalar ostida g‘oyib bo‘lgani uchun halok bo‘lganlar soni ancha yuqori bo‘lishi mumkin.

Isroil harbiylari G‘azo sektorida quruqlikdagi amaliyotlar kuchayganini e’lon qildi, Save the Children tashkiloti esa bu ko‘proq o‘lim, jarohatlar va azob-uqubatlarga olib kelishi haqida ogohlantirdi va shu bilan birga zudlik bilan o‘t ochishni to‘xtatishga chaqirgan.

G‘azodagi kamida 6360 bola, G‘arbiy Sohilda kamida 180 bola va Isroilda kamida 74 bola yaralangani xabar qilingan. G‘azoda 200 dan ortiq odam, jumladan, bolalar garovda qolmoqda.

Save the Children tashkiloti Isroil qo‘shinlarining G‘azoda kengaygan quruqlikdagi amaliyoti muqarrar ravishda ko‘proq bolalar qurbon bo‘lishiga olib kelishidan jiddiy xavotirda, chunki bolalar tanasi portlovchi qurollarga ayniqsa zaifdir. Shuningdek, tashkilot zudlik bilan o‘t ochishni to‘xtatishga chaqirgan.

Save the Children – nodavlat, xayriya tashkiloti bo‘lib, uning faoliyati urush, tabiiy ofatlar yoki turli xildagi boshqa ofatlar oqibatida og‘ir sharoitlarda qolgan bolalarni himoya qilish va qo‘llab-quvvatlashga qaratilgan.