35 km soat va 4 kmlik navbat. Londonda Qirolicha bilan vidolashish boshlandi

Buyuk Britaniya qirolichasi Yelizaveta II bilan ommaviy vidolashuv Londondagi Vestminster saroyida mahalliy vaqt bilan soat 17:00da boshlandi. Voqea joyidan Britaniyaning yetakchi telekanallari jonli efirda xabar berdi.

Angliya cherkovining ruhiy rahbari, Kenterberi arxiyepiskopi Jastin Uelbi va Vestminster abbatligi rektori Devid Xoyl xizmat qilgan liturgiya (tarixiy cherkovlarda eng muhim nasroniy xizmati – tahr.)dan keyin jamoatchilik Britaniya parlamenti binosining Vestminster zaliga kirishga ruxsat etila boshlandi. Xizmatda qirol Charlz III va monarxning boshqa farzandlari – malika Anna, York gersogi Endryu va Uesseks grafi Edvard ishtirok etdi. Bundan tashqari, zalda taxt vorisi, Uels shahzodasi Uilyam, uning ukasi shahzoda Garri va qirollik oilasining boshqa a’zolari, shuningdek, Britaniya hukumati rahbari Liz Trass ham bo‘lgan. 

Qirollik aholisi va mehmonlariga Qirolicha bilan xayrlashish uchun to‘rt yarim kun vaqt beriladi. Vestminster zali – parlamentning eng katta va eng qadimgi zali – 19 sentyabr - monarxning davlat dafn marosimi kuni soat 06:30 gacha ochiq bo‘ladi. Yopiq tobutda qirol hokimiyatining timsollari – Eduard VII ning shari va tayoqchasi joylashgan. Qirollik timsollarining tepasida Britaniya imperiyasining toji joylashgan. Minoradan olib kelingan toj va tayoq Afrika yulduzining bir qismi bo‘lgan “Kullinan-I” va “Kullinan-II” olmoslari bilan bezatilgan, ular hozirgacha topilgan eng katta marvarid olmosdir. Monarxning tansoqchilari, shu jumladan qirollik qo‘riqchilari va minora qo‘riqchilari tobutni kechayu kunduz qo‘riqlaydi. 

12 sentyab kuni Britaniya parlamenti devorlari oldida Yelizaveta II bilan vidolashmoqchi bo‘lganlar navbati shakllana boshladi. Ayni paytda u London ko‘prigigacha 4 kmga cho‘zilgan, ammo huquq-tartibot idoralari uning 15 kmgacha o‘sishi mumkinligi haqida ogohlantirmoqda va navbatdagilar unda kamida 35 soat vaqt sarflashi kerak bo‘ladi. Qirolicha bilan vidolashmoqchi bo‘lgan odamlarga politsiya maxsus bilaguzuklar tarqatadi, shunda ular ovqat va ichimliklar uchun qisqa tanaffus qilishlari yoki hojatxonaga borishlari mumkin. Rasmiylarning hisob-kitoblariga ko‘ra, Vestminster zalidan taxminan 500 ming kishi o‘tishi mumkin. 

Shu munosabat bilan London huquq-tartibot idoralari kuchaytirilgan ish rejimiga o‘tkazildi. Londonda tartibni saqlash bo‘yicha keng ko‘lamli operatsiyada 10 mingga yaqin politsiyachi va 1,5 ming harbiy xizmatchi ishtirok etmoqda. Shahar ustidagi havo bo‘shlig‘i yopiq, poytaxt markazida ko‘plab ko‘chalar to‘sib qo‘yilgan. 

Bugungi kunga qadar jasadi Vestminster saroyida ko‘rgazmaga qo‘yilgan Britaniya qirollik oilasining so‘nggi a’zosi Yelizaveta II ning onasi – Yelizaveta Bouz-Lyon (1900-2002) edi. 

Yelizaveta II 8-sentabr kuni 96 yoshida Shotlandiyadagi Balmoral qasrida vafot etdi, shundan so‘ng uning jasadi Edinburgda to‘xtab, Londonga yetkazildi. U Britaniya tarixidagi eng uzoq hukmronlik qildi – 70 yilu yetti oy. Yangi monarx uning to‘ng‘ich o‘g‘li, 73 yoshli Charlz. U Charlz III ismini oldi.