1 oyda O‘zbekistonning tashqi savdo aylanmasi 4,5 mlrd dollarga yetdi

2025 yilning yanvar oyida O‘zbekistonning tashqi savdo aylanmasi 4,5 mlrd dollarni tashkil etib, o‘tgan yilning shu oyiga nisbatan 7,1 foizga ko‘paydi. Bu haqda Statistika agentligi xabar berdi.

Ma’lum qilinishicha, ushbu oyda eksport 14,1 foizga o‘sib, 1,3 mlrd dollarga yetgan, import esa 4,4 foizga ko‘payib, 3,1 mlrd dollarni tashkil etgan. Bir oy ichida tashqi savdo taqchilligi 1,8 mlrd dollarni tashkil qilgan.

Qayd etilishicha, bu oy ham Xitoy O‘zbekistonning eng yirik savdo hamkori bo‘lib qolgan. U bilan tovar aylanmasi 994,7 mln dollarni tashkil etgan. Bu esa umumiy hajmning 22,1 foiziga teng degani. Ikkinchi o‘rinda Rossiya 799,1 mln dollar (17,7 foiz) bilan asosiy eksport yo‘nalishi hisoblanadi. Uchinchi o‘rinda esa Qozog‘iston 313,5 mln dollar (7 foiz) bilan, undan keyingi o‘rinlardan Turkiya 212,9 mln dollar (4,7 foiz) va Germaniya 169,3 mln dollar (3,8 foiz) bilan joy olgan. Ayni paytda O‘zbekiston dunyoning 154 ta mamlakati bilan savdo aloqalarini olib bormoqda.

Eslatib o‘tamiz, avvalroq O‘zbekistonning tashqi savdo aylanmasi o‘tgan yilning yanvar-noyabr oylari holatiga ko‘ra,  59,4 mlrd AQSH dollarga yetgani haqida xabar berilgandi.  Bu davrda respublikaning tashqi savdo aylanmasi 59,4 mlrd AQSH dollariga yetgan va 2023 yilning yanvar-noyabr oylariga nisbatan 2,1 mlrd AQSH dollariga yoki 3,6 foizga oshgan.