“1-gorbolnitsa”da janjal chiqdi. Shifoxonaga Hindistondan koronavirus yuqtirib kelgan bemor joylashtirildimi?

21 mart kuni kechki soatlarda ijtimoiy tarmoqlarda Toshkent shahridagi “Ibn Sino” nomli 1-son klinik shifoxonasi bilan bog‘liq audio va videolar tarqaldi. Unda ushbu shifoxonada karantinda qolayotgan fuqarolar shifoxonaga Hindistondan koronavirus infeksiyani yuqtirib kelgan bemor joylashtirilgani va bu bilan karantinda qolayotgan 1200 kishining hayoti xavf ostiga qo‘yilayotganini aytishgan. Videoda esa karantinda qolayotganlar va shifokorlar orasida janjal chiqqani tasvirlangan. O‘zbekiston Respublikasi Sog‘liqni saqlash vazirligi Matbuot xizmati rahbari Furqat Sanayev ushbu hodisaga izoh berdi. U shunday deydi: 

“Bugun ijtimoiy tarmoqlarda Toshkent shahridagi “Ibn Sino” nomli 1-son klinik shifoxonasi bilan bog‘liq audiolar tarqaldi. Unda koronavirusga chalingani taxmin qilingan bemor shifoxonaga joylashtirilishiga qattiq qarshilik ko‘rsatilgani, norozilik ovozlari eshitilgan. Mazkur voqea bo‘yicha quyidagilarni ma’lum qilamiz:

21 mart kuni soat 18:15da “Dehli-Toshkent” yo‘nalishi bo‘yicha Hindistondan uchib kelgan reysda 254 nafar yo‘lovchi orasida 9 yoshli bola ham bo‘lgan. Sirdaryolik bu bola Hindistonda boshidan operatsiya o‘tkazgan (ko‘pchilik odatda bu davlatga turli operatsiyalar o‘tkazib kelish uchun boradi – tahr.) va qaytgan paytida tana harorati 39 daraja bo‘lgan.

Respublikadagi vaziyat, shifo maskani yaqinligi hisobga olinib, qolaversa “Ibn Sino” nomli 1-son klinik shifoxonasi karantinga olingani va eng muhimi – reanimatsiya bo‘limida joy borligi uchun bola shu shifoxonaga olib borilgan. Qolaversa, har bir bemor, ayniqsa, bolalar sog‘ligi uchun shifokorlar javobgardirlar.

Bu shifoxonada saqlanayotganlar va ularning tashqarida turgan yaqinlari orasida “koronavirusga chalingan odam oramizga olib kelindi” degan gap tarqalib, shifokorlarning tushuntirishlariga qaramay keskin noroziliklar bildirilgan.

Keyinchalik bola boshqa ixtisoslashgan shifoxonaga joylashtirilib, reanimatsion chora-tadbirlar amalga oshirildi. Ayni paytda bola o‘z kuzatuvchisi bo‘lgan bobosi bilan maxsus joyda va ahvoli o‘rtacha og‘irlikda, koronavirusga oid laborator tekshiruvlar amalga oshirilmoqda. Bemor bu kasallikka chalingani ayni paytda tasdiqlanmagan.

Fursatdan foydalanib, shunday sinov davrida fuqarolarimizdan osoyishtalikni saqlab qolishni, vahimaga berilmaslikni, asossiz ma’lumotlar ta’siriga tushmaslikni yana bir bor so‘rab qolamiz. Unutmang, shifokorlar sizning sog‘ligingiz va xavfsizligingiz uchun har qachongidan ham ko‘proq qayg‘urmoqdalar”.

Eslatib ўтамиз, O‘zbekistonda koronavirusni yuqtirib olish bilan bog‘liq ilk holat joriy yilning 15 mart kuni qayd etilgan edi. Ayni vaqtda ushbu virusni yuqtirib olganlar 43 nafarga yetdi.

Qadrli yurtdoshlar, karantin davrida zarurat bo‘lmasa, ko‘chaga chiqmang. Vaqtni oilangiz, farzandlaringiz davrasida o‘tkazing. Unutmang, #UydaHayotBor