Homiladorlik ehtimoli: Samarqandda o‘smir qizlar nega ko‘rikdan o‘tkazilyapti?

Ijtimoiy tarmoqlarda tarqalgan, bir tumanda o‘smir qizlarning homilador bo‘lib qolgani va buning oqibatida tumandagi barcha o‘quvchi qizlar tibbiy ko‘rikdan o‘tkazilayotgani to‘g‘risidagi xabar bo‘xton. Bu haqda Samarqand sog‘liqni saqlash boshqarmasi matbuot xizmati byonot bermoqda. 

"Aholi o‘rtasida kasalliklarni erta aniqlash va dastlabki bosqichlarda bartaraf etish maqsadida Samarqand viloyatining nafaqat Tayloq tumani, balki, barcha shahar va tumanlarida tor soha xodimlari ishtirokida chuqurlashtirilgan tibbiy ko‘riklar tashkil etilmoqda", deyiladi rasmiy bayonotda.

Ta’kidlanishicha, 2019 yil davomida viloyat profilaktika-davolash muassasalari, tuman va shahar tibbiyot birlashmalarining mutaxassislari tomonidan maktabgacha ta’lim va ta’lim muassasalari hamda uyushmagan aholi o‘rtasida 200dan ortiq tibbiy ko‘riklar tashkil etilgan.

Uch million uch yuz mingga yaqin fuqaro tibbiy tekshiruvdan o‘tkazilgan. Shundan bir milliondan ziyodi 1 yoshdan 18 yoshgacha bo‘lgan fuqarolardir.