Hech kimga kodlarni bermang – Markaziy bank fuqarolarni ogohlantirdi

O‘zbekiston Markaziy banki mobil telefonga kelgan bir martalik SMS-kod, mobil ilovalar, veb-ilovalarga kirish huquqini beruvchi login va parollar bank xodimlari tomonidan so‘ralmasligi, shu bois hech kimga bunday ma’lumotlarni bermaslik zarurligi to‘g‘risida fuqarolarni ogohlantirmoqda.

MBga ko‘ra, televideniye, ijtimoiy tarmoqlar va rasmiy manbalar orqali ogohlantirish berilayotganiga qaramay, fuqarolar orasida firibgarlarning psixologik ta’siriga tushib, aldanib qolish holatlari uchramoqda.

Fuqarolarning qo‘l telefoniga qo‘ng‘iroq qilib, o‘zini Markaziy bank, tijorat banki, to‘lov tashkiloti yoki to‘lov tizimi operatorining nomidan xavfsizlik, plastik karta, mijozlarni qo‘llab-quvvatlash yoki boshqa bo‘lim xodimi deb tanishtirib, mobil ilovangiz buzilgani, bank kartangiz blok holatiga tushgani, kartadan noqonuniy pul yechib olishga urinishlar bo‘layotgani va shu kabi turli uydirmalarni keltirgan holda darhol chora ko‘rilmasa, barcha mablag‘lardan ayrilishi haqida aytib, firibgarlar tomonidan ijtimoiy injeneringni qo‘llagan holda turli psixologik bosim o‘tkazishga urinish holatlari shular jumlasidandir.

Markaziy bank turli firibgarlik yo‘li bilan bank kartalaridagi pul mablag‘lari yechilishiga yo‘l qo‘ymaslik maqsadida fuqarolarni ogohlantirdi.

“Hech qachon telefoningizga kelgan bank kartalari bilan bog‘liq bir martalik yuborilgan SMS-kodni, tijorat banklari, to‘lov tizimi operatorlari va to‘lov tashkilotlarining mobil ilovalariga kirish huquqini beruvchi login va parollarni hech qanday shaxslarga aytmang. Ular sizdan olgan ma’lumotlar (SMS kod, login va porol va h.k) orqali bank kartangizdagi pul mablag‘larini ko‘chirib olish yoki sizning ruxsatingizsiz boshqarish imkonini qo‘lga kiritadi. Firibgarlarning bu kabi hiylalariga aldanib qolmang”, deyiladi MB xabarida.