Hech qanday ish qilmagan odam xato ham qilmaydi – Mirziyoyev Ruzveltdan iqtibos keltirdi

Avvalroq, O‘zbekiston Prezidenti Oliy Majlis Qonunchilik palatasining birinchi majlisida ishtirok etayotgani va nutq so‘zlayotgani haqida xabar bergan edik.

Davlat rahbari nutqi davomida mamlakatda o‘tkazilgan so‘nggi saylovlarda yutuqlar bilan birga ko‘plab kamchiliklar ham bo‘lganini ta’kidlab o‘tdi. Xususan, Toshkent shahrida yavka u qadar yuqori bo‘lmagani va bu barcha yirik shaharlarga xos ekanini ta’kidladi.

Davlat rahbari o‘tgan parlamentda bo‘lgan 39 nafar deputat qayta saylanganini alohida e’tirof etdi.

"Sog‘-salomat yurib, kelgusi saylovlarning yakuni bo‘yicha oldingi tarkibdan 39 emas, 89 nafar deputat saylana ham rozi bo‘lardim. Bular 5 yilda parlamentarizm maktabini o‘tib, xalq ishonchini oqlagan. Buning uchun har bir daqiqani bekor o‘tkazmaslik kerak", deydi Mirziyoyev.

Prezident deputatlar xalq dardi bilan yashashi kerakligini ta’kidlab o‘tdi. Shavkat Mirziyoyev deputatlarning yurish-turishi, gap-so‘z va muomalasi ham barchaga o‘rnak bo‘lishi kerakligiga alohida urg‘u berdi. Davlat rahbari nutqi davomida Amerika Qo‘shma Shtatlari Prezidenti Teodor Ruzveltning so‘zlaridan iqtibos keltirdi:

“Hech qanday ish qilmagan odam xato ham qilmaydi. Xato qilishdan qo‘rqmaslik kerak, balki qayta xato qilishdan qo‘rqish kerak”.

Prezident shunday deb, yangi saylangan deputatlarni odamlar bilan faolroq muloqotga kirishishga chaqirdi.