Hayit namozining o‘qilish vaqtlari e’lon qilindi

O‘zbekiston musulmonlari idorasi 2024 yil Ramazon hayiti (Iydul fitr) 10 aprel (shavvol oyining 1 kuni) chorshanba kuniga to‘g‘ri kelayotgani munosabati bilan hayit namozi vaqtlarini belgilab chiqdi.

Shunga ko‘ra, 2024 yil 10 aprel kuni Ramazon hayiti namozi quyidagi vaqtlarda o‘qiladi:

1. Andijon viloyati   06:00
2. Namangan viloyati   06:00
3. Farg‘ona viloyati   06:00
4. Toshkent viloyati   06:10 
5. Toshkent shahri   06:10
6. Sirdaryo viloyati   06:10 
7. Jizzax viloyati   06:15
8. Samarqand viloyati 06:20 
9. Surxondaryo viloyati   06:25
10. Qashqadaryo viloyati   06:30
11. Navoiy viloyati   06:30 
12. Buxoro viloyati   06:30
13. Xorazm viloyati   06:50
14. Qoraqalpog‘iston Respublikasi   06:50  

Ma’lumot uchun, bugun, 8 aprel kuni “Muborak Ramazon hayitini nishonlash to‘g‘risida”gi O‘zbekiston Respublikasi Prezidentining qarori ham qabul qilindi. Qaror bilan Ramazon hayitining birinchi kuni 10 aprel – chorshanba kuniga to‘g‘ri kelishi haqidagi O‘zbekiston musulmonlari idorasining axboroti ma’lumot uchun qabul qilinib, mamlakatda 2024 yil 10 aprel kuni Ramazon hayiti bayrami sifatida keng nishonlanishi belgilandi.

Shuningdek, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari Din ishlari bo‘yicha qo‘mita, O‘zbekiston mahallalari uyushmasi, Ijtimoiy himoya milliy agentligi va boshqa hamkor tashkilotlar bilan birgalikda Ramazon hayitini xalqning milliy an’ana va urf-odatlariga uyg‘un holda o‘tkazish bo‘yicha tegishli chora-tadbirlarni amalga oshirishi ta’kidlangan.

Turizm qo‘mitasiga Transport vazirligi bilan birgalikda fuqarolar uchun Ramazon hayiti kunlarida mo‘’tabar ziyoratgohlar va tarixiy qadamjolarga ziyoratlarni tashkil etish maqsadida qulay sharoit va imkoniyatlar yaratish vazifasi topshirilgan.
Bundan tashqari,  O‘zbekiston Milliy teleradiokompaniyasi, O‘zbekiston Milliy axborot agentligi va boshqa ommaviy axborot vositalariga Ramazon hayitini nishonlash bilan bog‘liq tadbirlarni keng yoritish tavsiya etilgan.

Mazkur qarorning ijrosini nazorat qilish O‘zbekiston Respublikasi Bosh vaziri Abdulla Aripov va O‘zbekiston Respublikasi Prezidentining maslahatchisi  Muzaffar Komilov  zimmasiga yuklangan.