Hasanovning Tojikistondagi “parvozi”. “So‘g‘diyona” “Xo‘jand”ni yirik hisobda mag‘lub etdi

Bugun, 17 avgust kuni futbol bo‘yicha OFK kubogi Markaziy mintaqa finalidan o‘rin olgan “Xo‘jand” (Tojikiston) – “So‘g‘diyona” (Jizzax) uchrashuvi bo‘lib o‘tdi va unda jizzaxliklar yirik hisobda g‘alaba qozondi.

Uchrashuvning 13-daqiqasida “So‘g‘diyona”ning tajribali yarim himoyachisi Jasur Hasanov chap qanotdan ajoyib reyd amalga oshirdi va ikkita himoyachini ortda qoldirib, hisobni ochdi. Hasanov bu bilan to‘xtab qolmadi va u 21-daqiqada yana o‘sha o‘zining chap qanotidan tezlikda himoyachilardan qochib ketib, gol urdi. Hisob ishonchli ko‘rinishga kelgan bo‘lsa-da, “ko‘k bo‘rilar” bu bilan to‘xtashni istamadi. Natijada, bahsning 29-daqiqasiga kelib, Vitaliy Denisov tomonidan oshirilgan chiroyli uzatmani Shohruz Norxonov tojikistonliklar darvozasiga joylab qo‘ydi.

Birinchi bo‘limni 3:0 hisobida o‘z foydasiga hal qilgan jizzaxliklar ikkinchi taymda raqibga nisbatan bosimni biroz kamaytirgani sezildi. Uchrashuvning 79-daqiqasida  Javohir Qahramonov o‘yindagi yakuniy hisobni o‘rnatdi, 4:0. Shu tariqa, “Sug‘diyona” OFK kubogining keyingi bosqichiga yo‘l oldi. 

"Xo‘jand" — "So‘g‘diyona" 0:4

"Tojikiston mustaqilligining 20 yilligi" stadioni. Xo‘jand. 

Hakamlar: Kim Xi Gon, Kvak Sin Sun, Kan Don Xo (uchalasi ham — Janubiy Koreya).

Gollar: 0:1 Jasur Hasanov (13 daqiqa), 0:2 Jasur Hasanov (21), 0:3  Shohruz Norxonov (29), 0 :4 Javohir Qahramonov (79). 

"Xo‘jand": 50. Shohruh Qirg‘izboyev, 5. Firdavs Abdusalimov, 7. Elchibek Rashidbekov, 8. Ehson Boboyev, 18. Daler Yodgorov, 19. Sergey Garanza, 20. Samandar Ochilov, 21. Firdavs Chakalov, 62. Jahongir Ergashev, 73. Alisher Barotov, 97. Sergey Skanyan.

"So‘g‘diyona": 27. Milan Mitrovich, 2. Sardor Qulmatov, 6. Iskandar Shoyqulov, 10. Shohruz Norxonov, 11. Jasur Hasanov, 12. Xislat Xalilov, 19. Javohir Qahramonov, 26. Vitaliy Denisov, 31. Luka Chermel, 77. Daniyel Nasriddinov, 93. Marko Kolakovich.

Ma’lumot uchun, “So‘g‘diyona” OFK kubogining hududlararo yarim final bosqichida Hong Kongning “Istern” jamoasini qabul qiladi. Mazkur bahs joriy yilning 6 sentyabr kuni Jizzax shahrida bo‘lib o‘tishi rejalashtirilgan.