HAMAS sulh doirasida 34 isroillikni ozod qilishga rozi bo‘ldi – OAV

Falastinning HAMAS harakati G‘azo sektorida o‘t ochishni to‘xtatish rejimini joriy etish bo‘yicha kelishuvning birinchi bosqichi doirasida Isroil tomonidan taqdim etilgan ro‘yxatdagi 34 nafar garovdagilarni ozod qilishga rozi bo‘ldi. Bu haqda tashkilotdagi manbaga tayanib, “Asharq” telekanali xabar berdi.

Manbaga ko‘ra, Isroil tomonidan taqdim etilgan va HAMAS tomonidan tasdiqlangan ro‘yxat so‘nggi muzokaralar davomida kelishilgan mezonlarga muvofiq bo‘lgan. Qayd etilishicha, harakat ushbu garovdagilarni ozod qilishga rozi bo‘lgan, ammo ularning tirik yoki yo‘qligini aniqlash uchun taxminan bir hafta vaqt kerak bo‘ladi.

Kecha, 5 yanvar kuni “Reuters” ham HAMAS vakiliga tayanib, harakat G‘azo sektori bo‘yicha kelishuv doirasida ozod qilishga tayyor bo‘lgan 34 nafar garovdagi shaxsning ismlari kiritilgan ro‘yxatni tasdiqlaganini xabar qildi.

Ma’lumot uchun, 2023 yil noyabr oyining oxirida Misr va Qatar vositachiligida G‘azo sektorida bir haftalik gumanitar sulh o‘rnatilgan edi. Shu vaqt ichida Isroil ma’lumotiga ko‘ra, 110 nafar garovdagi shaxs ozod qilingan. Ammo shu yilning 1 dekabr kuni o‘t ochishni to‘xtatish rejimi buzilib, Falastin anklavida jangovar harakatlar qayta boshlandi. 2024 yilda Misr, Qatar va AQSH ishtirokida o‘tkazilgan bir necha muzokaralar davomida tomonlar kelishuv parametrlarini muhokama qilishda kelishuvga erisha olmadi.

Eslatib o‘tamiz, avvalroq HAMAS Isroil bilan G‘azo sektori bo‘yicha sulhga erishish ehtimoli haqida bayonot berib, buning amalga oshishini “har qachongidan yaqinroq” degan edi. Biroq Isroil Prezidenti Isxak Gersog muzokaralarda sulh bitimiga erishish ehtimoli ortib borayotgani haqidagi xabarlarga qaramay, hali muhim burilish ro‘y bermaganini ma’lum qildi. Bildirilishicha, Isroil delegatsiyasi Qatarda HAMASning bitim tafsilotlariga javobini kutmoqda, lekin ijobiy javob olish ehtimoli kam.