HAMAS siyosiy idorasini Dohadan Bag‘dodga ko‘chiradi – OAV  

Qatar va Amerika Qo‘shma Shtatlari HAMAS rahbariyatiga G‘azo sektorida o‘t ochishni to‘xtatish va isroilliklarni garovga olinganlarni ozod qilish bo‘yicha muzokaralarda ko‘proq moslashuvchanlik ko‘rsatish uchun bosim o‘tkazayotgani sababli harakat o‘zining siyosiy idorasini Dohadan Bag‘dodga ko‘chirishi mumkin. Bu haqda “The National” nashri xabar berdi.

Nashrning yozishicha, Qatar rasmiylari HAMAS rahbariyatiga agar o‘t ochishni to‘xtatish bo‘yicha kelishuvga erishilmasa, harakatning Dohadagi vakolatxonasini yopish va G‘azo sektori tashqarisidagi aktivlarini muzlatish bilan tahdid qilgan.

Nashrning yozishicha, Iroq hukumati harakatning siyosiy idorasini Bag‘dodga ko‘chirish imkoniyatini ma’qullagan.

Manbalarning “The National” nashriga ma’lum qilishicha, HAMAS siyosiy byurosi rahbari Ismoil Xoniya o‘tgan oy Iroq Bosh vaziri Muhammad al-Sudaniy va respublika hukumatining boshqa a’zolari bilan bu imkoniyatni muhokama qilgan.

Nashr suhbatdoshlariga ko‘ra, iyun oyida HAMAS Bag‘dodda Muhammad al-Hafiy boshchiligida o‘z vakolatxonasini ochgan, biroq harakat yetakchilari hozircha ko‘chgan sana haqida bir qarorga kelmagan.

“The National” manbalari Eron hukumati Iroq poytaxtida HAMAS yetakchilarining xavfsizligi uchun javobgar bo‘lishini xabar qildi. Nashrning yozishicha, “HAMASning xavfsizlik va logistika guruhlari” harakat rahbariyatining harakatga kelishiga tayyorgarlikni kuzatish uchun Bag‘dodga allaqachon jo‘nab ketgan.

Shu bilan birga, Iroq parlamenti a’zolaridan birining aytishicha, respublika siyosiy doiralarida HAMASning Bag‘dodga ko‘chishi bo‘yicha konsensus yo‘q.

“Ba’zilar, ayniqsa kurdlar va ba’zi sunniylar bu Qo‘shma Shtatlar bilan kelishmovchiliklarni chuqurlashtirishidan qo‘rqishadi. Ammo konsensus yo‘qligiga qaramay, hukumatning HAMASni joylashtirish haqidagi qarorini bekor qilib bo‘lmaydi”, deya ism-sharifi oshkor qilinmagan parlament a’zosining so‘zlaridan iqtibos keltirgan “The National”.

Qayd etish joizki, avvalroq Qatar hukumati rahbari va Tashqi ishlar vaziri shayx Muhammad bin Abdul Rahmon Ol Soniy Dohadagi HAMAS siyosiy idorasi kamida G‘azo sektoridagi mojaro tugaguniga qadar faoliyat yuritishini ma’lum qilgan. Qatar Bosh vazirining so‘zlariga ko‘ra, 2012 yilda “samarali ekanligi isbotlangan” aloqa kanalini ta’minlash, jumladan G‘azo sektoridagi gumanitar sulh vaqtida 100 dan ortiq isroillik garovga olinganlarni ozod qilish uchun Qatar poytaxtida HAMASning vakolatxonasi ochilgan.

Biroq HAMASning rasmiy vakili Izzat ar-Rishq rahbariyat o‘z siyosiy idorasini Qatardan Iroqqa o‘tkazish imkoniyatini ko‘rib chiqayotgani haqidagi ma’lumotni rad etdi.

“HAMAS Qatarni tark etib, Iroqqa borishni rejalashtirayotgani haqidagi iddaolar asosga ega emas”, deb yozdi Ar-Rishq Telegram-kanalida.