Жей Лонинг концертига чипталарнинг 70 фоизини хорижликлар сотиб олгани айтилди. Ишонамизми? (видео)

Кеча, 7 август куни Тошкент шаҳридаги “Бунёдкор”  стадионида америкалик мегаюлдуз Женнифер Лопезнинг концерти бўлиб ўтди. Ушбу тадбир учун 25 мингта чипта сотилган бўлиб, шундан 15 мингдан ортиғини ёки 68 фоизини хорижликлар сотиб олган. Бу ҳақда “Ахборот 24” дастурида хабар берилди.

Қайд этилишича, мамлакатлар бўйича 7,5 мингта чиптани Россия фуқаролари, 2,5 мингдан ортиғини Қозоғистон фуқаролари сотиб олган. Қолган харидорлар Европа ва бошқа мамлакатлардан бўлган.

Концерт чипталари нархи 1 миллион сўмдан 4,2 миллион сўмгача эди. Хабар қилинишича, концертга келган хорижликлар Ўзбекистонга 4-6 кунлик саёҳат учун тур-пакетларни харид қилган.

Эслатиб ўтамиз, кечаги концердан сўнг тармоқларда хонанданинг очиқ кийингани танқидларга сабаб бўлмоқда. Шундай муҳокамалар фонида Олий Мажлис Қонунчилик палатаси депутати, “Миллий тикланиш” демократик партияси фракциясининг раҳбари Алишер Қодиров Лопезга кўрсатган бағрикенгликни диндор аёлларга ҳам кўрсатишга чақириб, рўмол ўраган аёлларни паспорт учун расмга рўмолини ечиб тушишга мажбурлашни тўхтатиш кераклигини айтганди.