Ўзбекистоннинг ўйини сабаб “Бунёдкор”да тартибсизлик бўлди (видео)

Кеча, 23 июнь куни футбол бўйича Жаҳон чемпионати 2-тури доирасида Ўзбекистон ҳамда Португалия терма жамоалари баҳс олиб борди. Ушбу ўйин Тошкент шаҳридаги Бунёдкор стадионида катта экранда бепул намойиш этилди ва жой муаммоси сабаб тартибсизлик содир бўлди. Мазкур ҳолат юзасидан пойтахт Ички ишлар бош бошқармаси муносабат билдирди.

Унга кўра, Ўзбекистон ва Португалия терма жамоаларининг ўйинини томоша қилиш учун ташкил этилган Бунёдкор стадионидаги фан-зонада белгиланган жойлар тўлганлиги ва бўш ўринлар қолмаганлиги муносабати билан соат тахминан 21:00 ларда стадионга кириш тўхтатилиб, ташриф буюрган фуқароларга бошқа туманлардаги фан-зоналарга бориш тавсия этилган.

Қайд этилишича, айрим фуқаролар бунга норозилик билдириб, ўрнатилган тартибга зид равишда стадионга киришга ҳаракат қилган. Стадионда аҳоли хавфсизлигини таъминлаш учун жалб этилган ички ишлар органлари ва Миллий гвардия шахсий таркиби томонидан тезкорлик билан жамоат тартиби тикланган. Тартибни бузишга ҳаракат қилган фуқаролар билан профилактик суҳбат ўтказилиб, уларнинг барчаси расмий огоҳлантирилган.

Эслатиб ўтамиз, мазкур ўйинда Ўзбекистон миллимй терма жамоаси Португалия миллий терма жамоасига 5:0 ҳисобида мағлубиятга учради.