ЖЧнинг энг эсда қоларли учрашувлари: Аргентина – Мексика

QALAMPIR.UZ жорий йилда бўладиган мундиал олдидан ушбу мусобақа тарихида кузатилган энг эсда қоларли ўйнларини эслатади. 2022 йил 26 ноябрь, “Лусаил” стадиони. Жаҳон чемпионати гуруҳ босқичининг 2-туридан ўрин олган Аргентина – Мексика учрашуви.

Ушбу мундиал Аргентина учун жуда оғир бошланган эди. Илк турда жамоа кутилмаганда Саудия Арабистони миллий терма жамоасига мағлуб бўлди ва ўзини жуда қийин аҳволга солиб қўйди. Шу сабабли Мексикага қарши ўйин аргентиналиклар учун ҳал қилувчи аҳамиятга эга эди: ғалаба – умидни сақлаб қолиш, мағлубият эса деярли турнир билан хайрлашиш дегани эди. Бу нафақат жамоа, балки Лионель Месси учун ҳам катта босим бўлган. Унинг карьерасидаги энг катта орзу – Жаҳон кубогини қўлга киритиш яна хавф остида қолганди. 2014 йил йилги мундиал финалидаги мағлубият, Марио Гётценинг асосий вақт тугашига 7 дақиқа қолганда киритган ҳал қилувчи голи ҳалигача унутилмаган хотира эди. Албатта, Месси кейинчалик Копа Америкада ғалаба қозониб, терма жамоа билан соврин ютди. Шунингдек, Финалиссимада Италия устидан ишончли ғалаба ҳам қўлга киритилди. Бироқ уни Пеле ва Диего Марадона каби буюклар қаторида тўлиқ тан олиш учун айнан Жаҳон кубоги керак эди.

Учрашув агрессив бошланди. Биринчи таймнинг дастлабки ўттиз дақиқасида Аргентина деярли ҳужум қила олмади, асосан Мексика ҳужумларда фаол бўлди ва бир-икки вазиятда ҳисобни очишга яқин келди. Биринчи бўлим статистикаси ҳам шимолий америкаликларнинг зарбалар бўйича устунлигини кўрсатиб турди. Иккинчи бўлимда Аргентина босимни оширди, Мексика асосан ҳимояланиш билан овора бўлди ва бу 63-дақиқага келиб ўз самарасини берди. Ди Мариянинг ўнг қанотдан узатган тўпини жарима майдончаси ташқарисидан қабул қилиб Месси биринчи уринишда чап оёғига тўғрилаб олиб, иккинчи уринишда Мексика дарвозасининг узоқ пастки бурчагини нишонга олди ва бу вазиятда Гилерме Очоа ожиз қолди – 1:0. Голдан сўнг Аргентинанинг ўйини янада очилди ва баҳснинг асосий вақти тугашига 3 дақиқа қолганда қисқа паслар билан бурчак тўпини ўйинга киритган Скалони шогирдлари ҳисобдаги фарқни иккитага ошириб қўйди. Месси оширган узатмани ўша пайтда “Бенфика” шарафини ҳимоя қилаётган Энцо Фернандес жарима майдони ичида Андрес Гуардадони алдаб ўтиб, чиройли тарзда тўпни дарвозанинг юқори узоқ бурчагига жойлаб қўйди — 2:0. Ўйинда бошқа гол киритилмади ва Месси учрашувнинг энг яхши футболчиси деб топилди.

Шундан сўнг “Альбиселесте” 3-турда Польшани ҳам 2:0 ҳисобида мағлуб этди. Нимчорак финалда Австралия 2:1 ҳисобида енгилди, чорак финалда эса Нидерландия пенальтилар сериясида таслим этилди. Ярим финалда Аргентина 2018 йилги мундиал финалчиси Хорватияга қарши майдонга тушди. Қизиғи, ўша мундиалнинг гуруҳ босқичида аргентиналиклар 0:3 ҳисобида хорватларга мағлуб бўлган эди. Бу сафар эса барчаси тескари бўлди – Аргентина рақибини худди шу ҳисобда мағлуб этди. Францияга қарши финал эса Жаҳон чемпионатлари тарихидаги энг драматик ўйинлардан бири сифатида ёдда қолди. Аргентинанинг иккинчи голи, Килиан Мбаппенинг ҳисобни тенглаштириши, экстра-таймлардаги Коло Муанининг зарбаси ва Эмилиано Мартинеснинг “аср сейви” – буларнинг барчаси ўша кечани унутилмас қилди. Якунда эса Аргентина чемпионликни қўлга киритди. Лионель Месси эса орзуси ушалган мундиалда турнирнинг энг яхши футболчиси деб топилди.

Шу тариқа, Месси бошчилигидаги Аргентина тарихий ғалабага эришди. Ва айнан гуруҳ босқичидаги Мексикага қарши ўйин жамоа учун ҳақиқий бурилиш нуқтаси бўлди. Ана шу беллашувдан кейин уч карра жаҳон чемпионлари ўйиндан-ўйинга очилиб борди ва турнирни чиройли тарзда якунлади.

Рамазон Усанов