ЖЧ финали чипталари 2 млн доллардан ортиқ нархда эълон қилинди

FIFA’нинг чипталарни қайта сотиш сайтида Жаҳон чемпионати финали учун тўртта чипта савдога қўйилган бўлиб, уларнинг ҳар бири деярли 2,3 миллион долларга тенг. Бу ҳақда “Skynews” хабар берди.

Жорий йилнинг 19 июль куни Нью-Жерсидаги “MetLife Stadium” стадионида бўлиб ўтадиган ўйин учун 2 млн 299 минг 998,85 долларлик жойлар аренанинг пастки қаватида, дарвоза ортида жойлашган.

FIFA қайта сотиш/айирбошлаш майдончасидаги (Resale/Exchange Marketplace) нархларни назорат қилмайди, бироқ ҳар бир чипта харидоридан 15 фоиз ва сотувчидан 15 фоиз миқдорида воситачилик ҳақи олади. Бу шуни англатадики, агар финал чипталаридан бири 2,3 миллион долларга сотилса, FIFA’нинг ўзи бундан 690 000 доллар фойда кўради. 

Финал учун пастки қаватдаги яна бир “стандарт қулайлик” сифатида кўрсатилган жой 207 000 долларга, энг юқори (учинчи) қаватнинг охирги қаторидаги иккинчи тоифали чипта эса 138 000 долларга сотувга қўйилган. Ундан бир неча қадам наридаги бошқа бир жой учун 23 000 доллар сўралмоқда.

Жорий йилнинг 23 апрель куни сайтда финал учун эълон қилинган энг арзон чипталарнинг нархи дарвоза ортидаги энг юқори қаватнинг тепадан тўртинчи қаторидаги тўртта жой учун 10 923,85 долларни ташкил этган. FIFA изоҳ сўралган электрон хатга ҳали жавоб бермаган.

Жорий йилнинг 22 апрель куни FIFA ўзининг тўғридан тўғри чипта сотиш сайтида янги чипталар блокларини чиқарган. Финал учун мавжуд чипталар нархи 10 990 доллар этиб белгиланган. Таққослаш учун, январь ойида финал учун энг қиммат чипта 230 000 долларга баҳоланган эди.

Аввалги Жаҳон чемпионатларида қайта сотиладиган чипталар нархи уларнинг асл қиймати (номинал нархи) билан чекланган. 2022 йилги Жаҳон чемпионатида FIFA анча паст комиссия олган бўлиб, сотувчи ва харидордан 5 фоиз ёки 2 Қатар риали (0,50 доллар) миқдорида ҳақ олган.

Бу галги турнир учун АҚШ ва Канададаги иккиламчи бозорнинг (қайта сотиш бозори) бўшлигини важ қилиб, FIFA қайта сотиш нархларига чеклов қўймасликка қарор қилган. Ташкилотнинг даъво қилишича, бу чайқовчиларнинг “StubHub” каби учинчи томон сайтларидан фойдаланишига тўсқинлик қилади.

Шунингдек, FIFA сайтида 14 июль куни Арлингтонда (Техас) бўлиб ўтадиган ярим финал учун 11 130 доллардан, 15 июлдаги Атлантадаги ярим финал учун эса 9 660 ва 4 360 доллардан чипталар мавжуд бўлган.

АҚШ терма жамоасининг 12 июнь куни Лос-Анжелесда Парагвайга қарши ўтказадиган очилиш ўйини учун нархлар 4 105, 2 735, 2 330 ва 1 940 долларни, америкаликларнинг 19 июндаги Австралияга қарши Сиэтлдаги иккинчи ўйини учун эса 2 715 долларни ташкил этди. АҚШнинг гуруҳ босқичидаги сўнгги — Туркияга қарши Лос-Анжелесдаги ўйини чипталари 2 970 ва 1 345 долларга баҳоланди.

Канаданинг 12 июнь куни Торонтода Босния ва Герцеговинага қарши ўйини учун чипталарни 3 360, 2 240, 1 645 ва 980 долларга олиш мумкин бўлган.

11 июнь куни Мехико шаҳрида бўлиб ўтадиган Мексика ва Жанубий Африка ўртасидаги турнирнинг очилиш ўйини учун FIFA томонидан тўғридан тўғри ҳеч қандай чипта эълон қилинмаган.

Чорак финаллар учун нархлар: 9 июлдаги Фоксборо (Массачусетс) ўйини учун 4 200 ва 1 610 доллар, 10 июлдаги Лос-Анжелес ўйини учун 5 730 доллар, 11 июлдаги Майами-Гарденс (Флорида) ўйини учун 4 770 ва 1 815 доллар ҳамда Канзас-Ситидаги (Миссури) ўйин учун 4 080 доллар. 18 июль куни Майами-Гарденсда ўтадиган учинчи ўрин учун баҳс чипталарини 1 125 долларга сотиб олиш мумкин эди.