ЖЧ-2026 маскотлари намойиш этилди (видео)

Бугун, 25 сентябрь куни 2026 йилда АҚШ, Канада ва Мексикада ўтказиладиган футбол бўйича Жаҳон чемпионати маскотлари намойиш этилди. Бу ҳақда FIFA’нинг расмий сайтида хабар берилди.

Энди расман Клатч (бургут), Зайю (йўлбарс) ва Мэйпл (буғу) турнирни ҳамкорликда ўтказаётган уч давлатнинг рамзий жиҳатдан ифодалайдиган учлик ҳисобланади. Хусусан, Бургут – АҚШ, йўлбарс – Мексика ва буғу – Канада. Ушбу уч ҳайвон мазкур мамлакатларнинг табиий рамзлари бўлиш билан бирга илгари танланган маскотлардан фарқ қилади.

1994 йилда АҚШ Жаҳон чемпионатини ўтказганида Страйкер исмли кучук мамлакат маскоти бўлган эди, Мексика эса 1986 йилда Пике исмли қалампирни маскот қилиб танлаган. Бу илк маротаба эмас, 2002 йилда Жанубий Корея ва Японияда ҳам учлик маскот бўлган.

“26 жамоа энди янада катталашди ва янада қувноқ бўлди! Мэйпл, Зайю ва Клатч қувонч, энергия ва бирдамлик руҳига тўла, худди футбол бўйича Жаҳон чемпионати каби. Уч маскот бу ўйин тарихида бурилиш ясайдиган турнир учун биз яратадиган ҳайратланарли, кўнгилочар муҳитнинг марказида туради. Улар юракларни забт этади, бутун Шимолий Америкада ва бутун дунёда байрам кайфиятини уйғотади. Мен уларни болалар футболкалари устида, футбол афсоналари билан қўл уришаётгани ва бу турнир учун яна бир янгилик сифатида – миллионлаб одамлар ўйнайдиган видеоўйинларда тасаввур қила оляпман”, дейди FIFA президенти Жанни Инфантино.

Клатч – бургут. АҚШнинг рамзий қуши бўлмиш Клатч мамлакатни ифодалайди, у шунингдек CONCACAF маскотидан ҳам илҳомланган. Жамоанинг ярим ҳимоячиси бўлган Клатч саргузаштни севади ва жамоа аъзоларини дуч келадиган синовларга тайёрлайди.

Мэйпл – буғу. Жамоанинг дарвозабони ва Канаданинг рамзий тимсоли. Мэйпл эркин кезувчи, шунингдек санъат билан шуғулланади ва мамлакатдаги турли маданий келиб чиқишга эга одамлар билан боғланишга интилади. 

Зайю – йўлбарс. Мексиканинг ўрмонларидан келган Зайю ҳужумчи бўлиб, ўйинларга чиройли футбол кайфиятини олиб киради. Рақсни яхши кўради, ўзининг чаққонлиги билан тўсиқлардан осон ўтади, шунингдек, таом ва анъаналарни қадрлайди.

Маълумот учун, Ўзбекистон миллий терма жамоаси биринчи марта қатнашадиган Жаҳон чемпионати 2026 йил 11 июндан 19 июлгача АҚШ, Канада ва Мексикада ўтказилади. Турнирда илк бор 48 та терма жамоа иштирок этади. Финал эса Нью-Жерсидаги “MetLife Stadium” аренасида бўлиб ўтади.