Жапаров тақдирлаган “замҳоким” қўлга олинди

north_east

Ҳокимлар ови: Қирғизистонда яна бир ҳоким қўлга олинди (видео)

Миллий хавфсизлик давлат қўмитаси раҳбари Қамчибек Ташиевнинг 16 июль куни Тунгучда аҳоли билан учрашувидан сўнг Бишкек шаҳри ҳокимининг ўринбосари Жамолбек Ирсалиев қўлга олинди. Бу ҳақда АКИpress хабар берди.

Маълумот учун, Жамолбек Ирсалиев 1975 йил 28 августда туғилган.

2009 йилда Халқаро менежмент, ҳуқуқ, молия ва бизнес академиясини ҳуқуқшунослик йўналиши бўйича, 2015 йилда эса Россия Президенти ҳузуридаги Халқ хўжалиги ва давлат бошқаруви академиясини давлат ва муниципал бошқарув мутахассислиги бўйича тамомлаган.

1998-2003 йилларда “Ислом маданияти” газетаси бош муҳаррири, 2002-2008 йилларда “Тенир-Тоо-Дордой” жамоат ташкилоти бошқаруви раиси лавозимида ишлаган.

2015 йил 30 июндан 2016 йил октябргача Бишкек шаҳар кенгаши депутати бўлган.

Кейинчалик у Бишкек ҳокимлиги тузилмасида раҳбарлик лавозимларини эгаллашни бошлаган. 2020 йилнинг октябридан 2021 йилнинг июнига қадар Бишкек шаҳрининг уй-жой ва коммунал хўжалиги бўйича ҳоким ўринбосари, 2021 йилнинг июнидан 2021 йилнинг сентябригача эса биринчи ҳоким ўринбосари бўлган.

2021 йилнинг сентябридан 2022 йилнинг мартигача Первомай тумани ҳокими лавозимида ишлаган.

2022 йилнинг март ойида у яна ҳоким ўринбосари бўлди ва ўша йилнинг май ойида “Бишкектеплоэнерго” давлат коммунал хўжалиги директори этиб тайинланди.

2023 йилнинг август ойида у Марказий сайлов комиссиясига 2023 йилнинг 10 сентябрида бўлиб ўтган такрорий сайловда 26-сонли Ленин сайлов округи бўйича Жогорку Кенеш депутатлигига номзодини қўйиш нияти тўғрисида ариза билан мурожаат қилган. Сайловда у 8,70 фоиз овоз олган.

2024 йил 14 майда у яна шаҳар ҳокимининг транспорт, йўл инфратузилмаси ва рақамлаштириш бўйича ўринбосари этиб тайинланган.

2024 йилнинг декабрь ойи охирида Президент Садир Жапаров фармони билан Қирғизистон Республикасининг Фахрий ёрлиғи билан тақдирланган.

Эслатиб ўтамиз, аввалроқ Қирғизистоннинг Бишкек шаҳри ҳоким ўринбосари Таалайбек Бойгазиев пора олишда гумонланиб, ҳибсга олинганди. Шунингдек, Тўқмоқ шаҳри ҳокими Мақсад Нусувалиев ҳокимлик йиғилиши пайтида Миллий хавфсизлик давлат қўмитаси раҳбари Қамчибек Тошиевнинг буйруғи билан ҳибсга олинганди.