Жангимни марҳум қизимга бағишлайман – Шаҳрам Ғиёсов

Ўзбекистонлик профессионал боксчи Шаҳрам Ғиёсов марҳум қизига чемпион бўлишни ваъда бергани ҳақида гапирди. Бу ҳақда у “Matchroom Boxing” нашрига берган интервьюсида сўз очди.

“Мен бўлажак жангимни қизимга бағишлайман. Албатта, унинг вафоти қайғули. Уни жуда яхши кўрардим, уни ҳамон соғиняпман. Қизимга ва ота-онамга чемпион бўламан деб ваъда берганман”, дейди Ғиёсов.

Ярим ўрта вазн тоифаси рейтингида биринчи ўринни эгаллаб турган Шаҳрам Ғиёсов ҳозиргача профессионал боксда 16 та жангда иштирок этган ва барча жангида ғалаба қозонган.

Ғиёсов навбатдаги жангини Тошкент вақти билан эртага, 13 апрель куни Нью-Жерси штати, Атлантик Сити шаҳрида аргентиналик Франко Максимилиано Окампога қарши ўтказади.

Маълумот ўрнида, Ғиёсовнинг 2 ёшли қизи жорий йилнинг 19 март куни вафот этган.

Эслатиб ўтамиз, аввалроқ, Ғиёсов эртанги жанги олдидан “нигоҳлар тўқнашуви”да иштирок этгани ҳақида хабар берилган эди.