“Зенит” футболчисини ўғирлашга уринишди

Россиянинг Санкт-Петербург шаҳрида “Зенит” клуби футболчиси, Россия терма жамоаси аъзоси Андрей Мостовойни ўғирлашга уринган тўрт киши Россия тергов қўмитаси томонидан ҳибсга олинди. Бу ҳақда “Известия” нашри хабар берди.

Манбага кўра, жорий йилнинг 23 октябрга ўтар кечаси Вязовая кўчасида тўрт киши 27 ёшли Мостовойни ўғирлашга уринган. Улар спортчига ҳужум қилиб, уни микроавтобусга ўтқазишга ҳаракат қилишган, бироқ футболчи ўзини ҳимоя қилиб, воқеа жойидан қочиб қутулган.

Орадан икки кун ўтиб, 25 октябрь куни гумонланувчилар Крестовский оролидаги дўконда тадбиркор Сергей Селегенга ҳужум қилиб, уни машинага мажбуран ўтқазишган. Айбланувчилар жабрланувчини шаҳар бўйлаб олиб юриб, ундан криптовалюта ҳамёнига пул ўтказишни ва оиласи билан боғланишни талаб қилган. Кейинчалик, ҳуқуқ-тартибот идоралари аралашуви натижасида Селегень озод қилинган, тўрт нафар гумонланувчи эса ҳибсга олинган.

Тергов маълумотига кўра, гумонланувчилар Селегенни 210 минг рубль ўтказишга мажбурлаган, шунингдек, ундан 10 миллион рубль талаб қилган.

Сергей Селегень Санкт-Петербургда фаолият юритувчи “Физикани ривожлантириш” компанияси раҳбари бўлиб, қурилиш ва кўчмас мулк соҳасида бир нечта йирик лойиҳаларни амалга оширган. У Давлат Думаси депутати Вячеслав Макаровнинг куёви ҳисобланади. 

Маълумот учун, Андрей Мостовой 2019 йилдан бери “Зенит” сафида ўйнаб келади. У жамоа билан Россия чемпионатининг тўрт карра ғолиби, Россия кубоги ва Суперкубогининг бир неча карра соҳиби ҳисобланади. Футболчи Россия терма жамоаси сафида 20 та ўйин ўтказиб, 3 та гол урган.