“Зеля, эркак бўл”. Қодиров Зеленскийга ҳақоратомуз жавоб қайтарди

Чеченистон Республикаси раҳбари Рамзан Қодиров Украина Президенти Владимир Зеленскийнинг АҚШ Чеченистон раҳбарига нисбатан Венесуэла етакчиси Николас Мадурога ўхшаш чоралар кўриши кераклиги ҳақидаги баёнотига кескин муносабат билдирди. У бу ҳақда ўзининг Telegram-каналида ёзди. 

Қодиров Украина раҳбарини ҳибсга олиш операциясини ўзи бажармай, бировдан сўраганини танқид қилиб, ушбу ҳатти-ҳаракатлар “эркакчиликка” тўғри келмаслигини айтган. Қодировнинг таъкидлашича, Украина томонининг АҚШдан уни ўғирлаб кетиш бўйича ёрдам сўраши қўрқоқлик ва ожизлик белгисидир.
-  “Масхарабоз АҚШ ҳукуматига мени ўғирлашни таклиф қилмоқда. Эътибор беринг, буни эркак кишидек ўзи амалга ошириши билан таҳдид ҳам қилмади.

Ҳатто бундай фикрни хаёлига келтиришга ҳам ботина олмади. Зеля ўзининг ҳақоратчиси — “ҳайбатли амаки” Рамзан Қодировни бошқа биров жазолашини четдан, хавфсиз масофадан туриб кузатишга қарши эмаслигига қўрқоқларча ишора қилди” деган у.

Шунингдек, Чеченистон раҳбари Украина Президенти уни қидирувга берганини, унга нисбатан санкциялар жорий этилиши ташаббускори бўлганини таъкидлаган. Қодиров постида Зеленскийни “эркак” бўлишга чақириб, бу ҳаракатлари жуда шармандали эканини айтган. 

“Бу иблис нималар қилмаяпти дейсиз: мени қидирувга ҳам беряпти, санкциялар ҳам жорий қиляпти. Энди эса америкаликлардан ёрдам сўраб, гўё "қурол-яроғ билан ёрдам бермадингиз, ҳеч бўлмаса Рамзанни ўғирлаб беринг" деяётганга ўхшайди. Зеля, ҳеч бўлмаса эркак бўлишга уриниб кўр. 

Бўлолмасанг ҳам – урин. Ўз обрўйингни сақла ва бунчалик хор бўлма. Агар сенда озгина бўлса ҳам эркаклик бўлганида, сўзларинг ва илтимосларинг қанчалик ҳақоратли янграётганини тушунган бўлардинг ”, деган Қодиров. 

Шунингдек, Рамзан Қодиров Зеленскийни кинояли тарзда “муддати ўтган” деб атаган, шу билан бирга, Украина етакчиси билан тортишув фонида душманларини кескин оҳангда огоҳлантирган. 

"Сенга эслатиб қўяман, Зеля: душман республикамизга кириши мумкин, аммо чиқиб кетиши имконсиз. Ёки ўзинг таваккал қилиб кўрасанми, муддати ўтган?", деган Путиннинг ишончли одамларидан бири Қодиров.

Эслатиб ўтамиз, аввалроқ Украина Президенти Владимир Зеленский АҚШ ҳукуматига Чеченистон раҳбари Рамзан Қодиров ҳам худди Венесуэла Президенти Николас Мадуро каби ҳибсга олиниши кераклигини айтган эди.