Зеленский АҚШга Рамзан Қодировни ҳам қўлга олишни таклиф қилди (аудио)

Украина Президенти Владимир Зеленский АҚШ ҳукуматига Чеченистон раҳбари Рамзан Қодиров ҳам худди Венесуэла Президенти Николас Мадуро каби ҳибсга олиниши кераклигини айтди. Бу ҳақда у бугун, 7 январь куни журналистлар билан Президент офисидаги мулоқотда тўхталган.

Зеленскийнинг сўзларига кўра, ҳозирда америкаликлар билан дипломатик алоқалар самарали ишламоқда.

“Америка билан ижобий натижалар бор, аммо ҳали охиригача етказилмаган. Улар Россияга босим ўтказиши керак. АҚШда буни амалга ошириш учун ҳарбий салоҳият етарли ва улар буни қила олади. Энг муҳими, Украина улар учун устувор бўлиши керак”, деган Украина раҳбари. 

Шунингдек, Владимир Зеленский Оқ уй маъмурияти Россияга босим ўтказишнинг турли хил усулларини, жумладан Чеченистон раҳбарини қўлга олиш миссиясини синаб кўриш кераклигини айтган. 

“Мана масалан, Мадуро билан боғлиқ мисолни олинг. Операция ўтказилди. Натижасини ҳамма, бутун дунё кўрди. Жуда тез амалга оширилди. Хўш, нега энди Қодиров билан – ўша қотил билан – қандайдир операция ўтказмаслик керак? Балки шунда Путин буни кўриб, ўзига келиб қолар”, деган у. 

Эслатиб ўтамиз, аввалроқ АҚШ кучлари томонидан Венесуэла Президенти Николас Мадуро ва унинг рафиқаси қўлга олиниб, мамлакатдан олиб чиқиб кетилган эди. Ҳозирда улар Нью Йоркдаги тергов изоляторида сақланмоқда. Эр-хотинга наркотикларнинг ноқонуний муомаласи билан боғлиқ турли айбовлар қўйилган. Бироқ улар бу айбловларни рад этмоқда.