Зеленскийни мукофотдан маҳрум қилиш керак – Навроцкий

Польша Президенти Кароль Навроцкий Украина Президенти Владимир Зеленскийни мамлакатнинг энг юқори давлат мукофоти – “Оқ бургут” орденидан маҳрум қилиш масаласини кўриб чиқишни таклиф қилди. Бу ҳақда “Reuters” хабар қилди.

Бунга Зеленскийнинг Украина махсус кучларининг бир бўлинмасига Иккинчи жаҳон уруши даврида поляклар қатлида иштирок этган деб ҳисобланувчи Украина Қўзғолончилар Армияси (UPA) номи билан боғлиқ “УПА қаҳрамонлари” номини бериш ҳақидаги қарори сабаб бўлган. Украинада айрим миллатчилар УПАни Совет Иттифоқи ва фашистлар Германиясига қарши курашган қаҳрамонлар сифатида кўрса, Польша бу ташкилотни 1943–1945 йилларда Волинь ҳудудида тахминан 100 минг полякнинг ўлими учун айбдор деб ҳисоблайди.

Зеленскийнинг қарорига муносабат билдирган Навроцкий бу ҳолатдан “ғазабланганини” айтган ва Зеленскийни “Оқ бургут” орденидан маҳрум қилишни таклиф қилди. Унинг сўзларига кўра, мазкур мукофот бўйича махсус кенгаш 8 июнь куни йиғилиш ўтказади.

Польша Бош вазири Дональд Туск ҳам Украина раҳбарининг қарори “полякларнинг тарихий хотирасига оғриқ етказиши” ва икки давлат муносабатлари нуқтаи назаридан ташвишли эканини таъкидлаган. Тинчлик бўйича Нобель мукофоти соҳиби, Польшада коммунистик тузум қулашида муҳим роль ўйнаган Лех Валенса эса, норозилик сифатида Украина байроғи туширилган нишонни тақишдан воз кечганини маълум қилган.

“УПА аъзоларини шарафлаш орқали Украина президенти мени ва қирғин қилинган ватандошларимизни ҳақорат қилди”, деб ёзган Валенса ижтимоий тармоқда.

Польша 2022 йилдан бери Россияга қарши урушда Украинанинг энг яқин иттифоқчиларидан бири бўлиб келмоқда. Собиқ президент Анджей Дуда 2023 йилда Зеленскийни Польшанинг энг юқори давлат мукофоти – “Оқ бургут” ордени билан тақдирлаган эди.

Эслатиб ўтамиз, аввалроқ Киев шаҳар суди Владимир Зеленский идорасининг собиқ раҳбари Андрей Ермакни 140 миллион гривна (тахминан 3,1 миллион доллар) гаров эвазига озод қилиш имконияти билан 60 суткалик қамоқ жазосига ҳукм қилган эди.