Зеленский Ермакни ишдан бўшатишдан бош тортди

Украина Президенти Владимир Зеленский энергетика соҳасидаги давлат компанияси “Энергоатом” атрофидаги коррупция можароси фонида ўзининг яқин ҳамкори Андрей Ермакни Украина Президенти идораси раҳбари лавозимидан бўшатишдан бош тортди. Бу ҳақда Зеленский кеча, 20 ноябрь куни “Слуга народа” партияси фракцияси депутатлари билан учрашувда билвосита маълум қилган, деб хабар берди “Украинская правда” ва “Hromadske” нашрлари.

Учрашувда депутат Марьяна Безуглая давлат раҳбаридан Ермак ва бошқа мансабдор шахслар ишдан олинади-йўқми деб сўраган. Зеленский Президент офисидаги кадрлар масаласи президентнинг масъулияти эканини айтди ва Ермак истефоси бўлмаслигини тушунтириб ўтган.

Шу билан бирга, Рада депутати Фёдор Вениславскийга кўра, “Слуга народа” фракциясининг жуда кўп аъзолари Андрей Ермак истефога чиқиши керак деб ҳисоблайди.

Украинадаги коррупция можароси

Украина Миллий антикоррупция бюроси (НАБУ) ва Ихтисослашган антикоррупция прокуратураси (САП) 10 ноябрь куни “Энергоатом” атрофидаги йирик коррупция схемаси фош этилганини маълум қилган.

Можаро марказида Украина амалдорлари, Президентнинг кўп йиллик ҳамкори Тимур Миндич ва молиячи Александр Цукерман турган. Шундан кейин ҳуқуқни муҳофаза қилувчи органлар Миндичнинг уйида, “Энергоатом”да ва Украина адлия вазири Герман Галушенконикида тинтувлар ўтказди. Миндич эса бу воқеалардан олдин мамлакатни тарк этган.

12 ноябрь куни Зеленский Галушенко (икки кун аввал вазифасидан четлатилган) ва энергетика вазири Светлана Гринчукни ишдан олишни талаб қилди. 19 ноябрь куни Олий рада ҳар икки вазирнинг истефосини маъқуллади.

Зеленский фармонига биноан Миндич ва Цукерманга нисбатан санкциялар жорий этилган.