Зеленский Туркияга борди (видео)

Бугун, 18 февраль куни Украина Президенти Владимир Зеленский Туркияга борди. Бу ҳақда Президент ўзининг Telegram-каналида маълум қилди. 

Қайд этилишича, ушбу ташрифдан асосий мақсад – кўпроқ украиналик аскарларни уйига қайтариш, озиқ-овқат хавфсизлиги муаммоларини ҳал этишдан иборат.

“Халқимиз ватанига қайтиши учун барча ҳаракатлар давом этади”, дея ёзган Зеленский ўз саҳифасида.

Шунингдек, Президентнинг турмуш ўртоғи Елена Зеленская ҳам Туркияга давлат раҳбари билан бирга ташриф буюрган.

Қолаверса, Зеленский ташриф давомида Туркиянинг биринчи президенти Мустафо Камол Отатурк хотираси эсланганини ҳам қўшимча қилган.

“Туркияга ташриф аввалида Туркия тарихи ва қадриятларининг муҳим қисми бўлиб қолаётган мамлакатнинг Биринчи Президенти Мустафо Камол Отатурк хотирасига ҳурмат бажо келтирилди”, дейилади хабарда.

Маълумот учун, Зеленский Туркияда бўлиб турган даврда Саудия Арабистонида АҚШ ва Россия вакилларининг расмий учрашуви бўлиб ўтмоқда. Европа етакчилари ҳам Франция пойтахти Парижда фавқулодда саммит ўтказиб, Трамп маъмуриятининг Европа иштирокисиз Москва билан музокаралар олиб бориш режаларига нисбатан нима қилиш кераклигини муҳокама қилган. Учрашув якунлари бўйича аниқ қарорлар эълон қилинмаган, бироқ Европа Иттифоқи ва НАТО мудофаага кўпроқ сармоя киритиш ва Киевга ишончли хавфсизлик кафолатларини тақдим этиш зарурлигини билдирган.

Эслатиб ўтамиз, аввалроқ Владимир Зеленский Украина Саудия Арабистонидаги музокараларда қатнашмаслиги ва у ерда эришилган низоларни ҳал қилиш бўйича ҳеч қандай келишувни тан олмаслиги ҳақида гапирганди. Зеленскийнинг сўзларига кўра, Украина Саудия Арабистонида Украинасиз ўтадиган музокараларнинг ҳеч қандай натижасини тан олмайди.