Зеленский Трамп билан учрашиш учун шарт қўйди

Украина Президенти Владимир Зеленский АҚШ раҳбари Дональд Трамп билан учрашишга тайёрлигини, аммо бу учрашувда Европа ҳамкорлари ҳам қатнашиши кераклигини билдирди. Украина етакчисининг сўзлари “Страна.уа” томонидан эълон қилинди.

“Мен Президент Трамп билан учрашишга тайёрман, муҳокама қилиниши керак бўлган нозик масалалар бор. Аммо музокараларда менинг ёнимда Европа ҳамкорлари бўлиши шарт”, деган Зеленский. 

Украина етакчисининг сўзларига кўра, Женевада АҚШ билан ўтказилган музокаралар яхши натижа берган. 

“Украинанинг қўлида бизнинг жамоаларимиз томонидан Женевада ишлаб чиқилган концептуал ҳужжат мавжуд. Бу ҳужжат муҳокама қилинмоқда ва биз олдинга юра оламиз – Америка Қўшма Штатлари билан, Президент Трампнинг шахсий иштирокида ва Европа билан”, дея қўшимча қилган Зеленский. 

Украиналик манбанинг маълумотига кўра, янги тинчлик режаси лойиҳасининг якуний матни ҳали келишилмаган. Унинг айтишича, бандларнинг аксарияти бўйича “консенсус”га эришилган, бироқ камида учта масала бўйича келишмовчиликлар сақланиб қолган. Хусусан, ҳудудларнинг берилиши масаласида ҳозирча якдил қарор йўқ. 

“Украина томонидан қабул қилинган версия бор, деб айтиш ҳозир мутлақо нотўғри бўларди”, деган манба.

Эслатиб ўтамиз, аввалроқ Россия ва Украина ўртасидаги можарони тугатишга қаратилган АҚШ режаси Женевадаги музокараларда қайта кўриб чиқилганди. Ҳужжат 28 банддан 19 бандга камайтирилган. Швейцариядаги музокаралардан сўнг янгиланган тинчлик режасидан АҚШ ва Россия ўртасидаги, Украина можаросига бевосита алоқаси бўлмаган муносабатларга оид бандлар чиқариб ташланган.

Шу муҳокамалар фонида Россия Президентининг ёрдамчиси Юрий Ушаков Европанинг таклифлари самарасиз ва Кремль манфаатларига мос келмаслиги ҳақида айтган. У Европа таклифлари, деганда АҚШ ва Украина делегациялари Женевада муҳокама қилган ўша ҳужжат назарда тутилганми ёки йўқ аниқ айтмаган.