Зеленский Россияга таҳдид қилган АҚШ сенаторлари билан учрашди

Кеча, 30 май куни америкалик сенаторлар Линдси  Грэм ва Ричард Блументал Украина Президенти Владимир Зеленский ҳузурида бўлди. Бу ҳақда Зеленский ўзининг Telegram-каналида маълум қилди.

Зелинскийнинг билдиришича, у америкалик сенаторлар билан яхши учрашув ўтказган ва уларнинг Украинада айнан саъй-ҳаракатларни мувофиқлаштириш энг зарур бўлган вақтда бўлиб турганидан миннатдор эканини айтган.

“Биз Россия дипломатияни масхарага айлантирмоқчи бўлаётганини бирдек тушунамиз. Улар музокаралар билан ниқобланмоқда, аммо фронтда янги ҳужум операцияларига тайёргарлик кўрмоқда, ҳар куни шаҳар ва қишлоқларимизни ўққа тутмоқда, ўт очишни тўхтатиш бўйича барча таклифларни рад этмоқда”, деган Украина Президенти.

Бундан ташқари, Украина Президенти қўшимча босим зарур эканини ва икки партияли санкциялар тўғрисидаги қонун лойиҳаси ташаббуси учун миннатдорлигини маълум қилган. 

“Бу ташаббусни аллақачон 82 сенатор қўллаб-қувватлаган. Биз ушбу масалани ва Россияни тинчликка мажбур қилиш учун қўллашимиз мумкин бўлган бошқа чораларни муҳокама қилдик. Бу йўналишда биргаликда ишлашда давом этамиз. Ҳаётни ҳимоя қилишда кўрсатган кучли икки партияли қўллаб-қувватловингиз ва етакчилигингиз учун ташаккур. Музокараларнинг барча босқичларида АҚШнинг реал иштироки барқарор тинчликка кафолат бера олади”, дея таъкидлаган Зеленский.

Эслатиб ўтамиз аввалроқ, АҚШ Сенати агар Москва яқин орада Украинадаги ўт очишни тўхтатиш бўйича қабул қилиб бўлмайдиган шартларни илгари сурса, Россияга нисбатан 500 фоизлик иккиламчи бож тарифларини жорий этиш билан таҳдид қилганди. Линдси Грэм ва Ричард Блументал айнан шу санкцияларнинг муаллифлари ҳисобланади. Айниқса, Линдси Грэм АҚШ Президенти Дональд Трампнинг яқин иттифоқчиси ҳамдир.

Бунгача Путин Истанбулга бормаган тақдирда, Европа етакчилари АҚШ Конгрессидан Линдси Грэм томонидан илгари сурилган кескин санкциялар пакети қабул қилинишига ишонч ҳосил қилганди. Грэм бу санкцияларни “суякни чил-чил қилувчи” деб таърифлаган эди. 

Шунингдек, “Катта еттилик” давлатларининг Молия вазирлари Россияга босимни кучайтиришга тайёр эканини билдирганди. Улар Россиянинг Украинага нисбатан ҳарбий ҳаракатларини қоралаб, “можаро давомида Россияни қўллаб-қувватловчи ҳар қандай ташкилот” Украина тикланишида иштирок этиш ҳуқуқидан маҳрум бўлишини маълум қилган. Шунингдек, агар Москва ўт очишни тўхтатишга рози бўлмаса, G7 санкцияларни янада кучайтиришга ваъда берган.

Жалолиддин Раҳмонов