Зеленский Путинга G7 саммитида учрашишни таклиф қилди

Украина Президенти Владимир Зеленский 15–17 июнь кунлари Францияда бўлиб ўтадиган “Катта еттилик” (G7) саммити доирасида Россия Президенти Владимир Путин билан учрашишни таклиф қилди. Бу ҳақда “Reuters” хабар берди.

Зеленскийнинг айтишича, ушбу учрашувда АҚШ Президенти Дональд Трамп ва Франция Президенти Эммануэль Макрон ҳам иштирок этиши мумкин.

“Биз Путин билан G7 доирасида учрашишга тайёр эканимиз ҳақида хабар бердик. У ерда Трамп ва Макрон бўлади, яъни Европа ва Америка вакиллари бир жойда бўлади. Бу ҳаммамиз учун учрашиш ва музокара олиб бориш учун яхши имконият”, деган Зеленский.

Унинг таъкидлашича, Трамп ва Макрон бу таклиф ҳақида хабардор қилинган. Бироқ Украина Президенти Россия томони яна урушни якунлаш бўйича мулоқотга тайёр эмаслигини билдирганини айтди.

Аввалроқ, Зеленский Путинга очиқ мактуб йўллаб, бутун фронт чизиғи бўйлаб ўт очишни тўхтатиш ҳамда нейтрал ҳудудда шахсий учрашув ўтказишни таклиф қилган эди.

Путин эса мактубда “қўполлик унсурлари” борлигини айтиб, бундай учрашув Украина томони учун Россия армиясининг ҳужумини тўхтатиш мақсадида кераклигини таъкидлаган. Шунингдек, у Россия қисқа муддатли эмас, узоқ муддатли ва барқарор келишувларга эришишни исташини билдирган.

G7 саммити олдидан Путин Трамп билан телефон орқали мулоқот қилиб, уни 80 ёшга тўлгани билан табриклади ҳамда Украина уруши ва бошқа халқаро масалаларни муҳокама қилди. Кремль маълумотига кўра, Трамп можарони тезроқ якунлаш учун Европа давлатлари ва Киев билан ишлашга тайёрлигини билдирган.

Эслатиб ўтамиз, кеча, 15 июнь куни Франциянинг Эвиан-ле-Бен шаҳрида “Катта еттилик” — G7 давлатлари раҳбарларининг саммити бошланган эди.