Зеленский музокараларга даллоллик қилаётган Эрдўған билан гаплашди

Украина Президенти Владимир Зеленский кеча, 12 май куни Туркия Президенти Ражаб Тойиб Эрдўған билан телефон орқали мулоқот қилди. Бу ҳақда Украина раҳбари ўзининг Telegram-каналида ёзиб қолдирди.

Зеленскийга кўра, у Туркия раҳбари билан бўлажак учрашувлардан олдин баъзи бир масалаларни муҳокама қилган.

“Туркияда бўлиб ўтадиган учрашувнинг асосий тафсилотларини муҳокама қилдик, бу учрашув урушни тугатишга ёрдам бериши мумкин. Биз ўт очишни тўхтатиш заруратини бирдек кўрамиз. Шунингдек, ўт очишни тўхтатиш режимини назорат қилиш учун ҳамкорларимиз мониторингни таъминлаши керак. Биз Путиннинг ўзи билан тўғридан тўғри музокараларга тайёрмиз. Европада хавфсизликни узоқ муддатга таъминлаш йўлида биргаликда ҳаракат қилишимиз муҳим. АҚШ билан доимий алоқада бўламиз”, дея ёзиб қолдирган Украина раҳбари.

Унинг таъкидлашича, Украина ўт очишни тўхтатишни зарур деб билади.

Ўз навбатида, Президент Эрдўған ҳам Россия ва Украина ўртасида тўғридан тўғри музокаралар ўтказишга тайёрлигини билдирган. У ушбу зиддиятни ҳал қилиш йўлида пайдо бўлган имконият бой берилмаслигига умид билдирган.

Эслатиб ўтамиз, аввалроқ АҚШ Президенти Дональд Трамп Туркия етакчиси Ражаб Тойиб Эрдўғанга мурожаат қилиб, Украинадаги можарода воситачилик қилишни сўраган эди. Трампга кўра, Туркия раҳбарининг Россия билан ҳам, Украина билан ҳам алоқаси жуда яхши ва у воситачилик ролини амалга ошира олади. Қолаверса, 10 май куни Украина Президенти Владимир Зеленский ва Киевга борган европалик сиёсатчилар тинчлик саъй-ҳаракатлари бўйича АҚШ Президенти Дональд Трамп билан телефон мулоқот қилган эди. Мулоқотда Зеленский  12 май кунидан бошлаб Украина 30 кунга ўт очишни тўхтатишга тайёрлигини билдирган эди. 11 майга ўтар кечаси эса Россия Президенти Владимир Путин Украинага ҳеч қандай шартларсиз Истанбулда тўғридан тўғри музокара ўтказишни таклиф қилганди. Украина Президенти Владимир Зеленский эса 15 май куни Истанбулда Россия Президенти Владимир Путин билан тўғридан тўғри музокаралар ўтказишга тайёрлигини маълум қилган.