Зеленский махсус дубулға учун дисквалификация қилинган спортчини тақдирлади

Украина Президенти Владимир Зеленский Халқаро Олимпия қўмитаси қарори билан дисквалификация қилинган украиналик скелетончи Владислав Гераскевични “Озодлик” ордени билан тақдирлади. Бу ҳақда Зеленский Telegram-каналида маълум қилди.

Давлат раҳбари Халқаро Олимпия қўмитаси қарорини кескин танқид қилган. Унинг айтишича, Гераскевич россияликлар томонидан ўлдирилган украиналик спортчиларнинг суратлари туширилган дубулға билан чиқиш қилгани учун жазоланган.

“Спорт унутувчанликни англатмайди ва Олимпия ҳаракати урушларни тўхтатишга ёрдам бериши керак, тажовузкорлар қўлига ўйнашга эмас. Афсуски, ХОҚнинг украиналик скелетончини дисквалификация қилиш ҳақидаги қарори кўп нарсани англатади. Бу адолат ва тинчликни қўллаб-қувватлашга асосланган олимпизм тамойилларини акс эттирмайди”,  дейди Зеленский.

У, шунингдек, Россия Олимпия тамойилларини мунтазам бузиб келганини эслатиб, 2008 йилги Грузия уруши, 2014 йилги Қрим аннексияси ҳамда 2022 йилдан бошланган Украинага қарши кенг кўламли босқинни тилга олган. Зеленскийнинг сўзларига кўра, 2026 йилги қишки Олимпиада арафасида сулҳ бўйича кўплаб чақириқларга қарамай, Россия Украинага ракета ва дрон ҳужумларини давом эттирмоқда.

Президент Россия тажовузи оқибатида 660 нафар украиналик спортчи ва мураббий ҳалок бўлганини ҳам қайд этган. Шунга қарамай, россиялик спортчилар Милан ва Кортинада ўтказиладиган Олимпиадада “нейтрал” байроқ остида иштирок этаётганини танқид қилган.

“Биз Владислав ва унинг ҳаракатлари билан фахрланамиз. Жасорат шунчаки медаллардан кўпроқ нарсани англатади”,  дейди Зеленский.

Президент кеча, 12 февраль куни Гераскевични “Озодлик” ордени билан мукофотлаш тўғрисидаги фармонни имзолаган. Спортчи “Украина халқига фидойилик билан хизмат қилгани, фуқаролик жасорати ҳамда озодлик ва демократик қадриятларни ҳимоя қилишдаги ватанпарварлиги” учун тақдирланган. 

Эслатиб ўтамиз, аввалроқ қишки Олимпия ўйинлари арафасида украиналик скелетончи Владислав Гераскевич Россия босқини пайтида ҳалок бўлган украиналикларнинг суратлари акс эттирилган дубулғадан фойдалангани учун мусобақалардан четлаштирилгани ҳақида хабар берилганди.