Зеленский АҚШнинг ҳарбий ёрдами тўхтатилишига муносабат билдирди

Украина Президенти Владимир Зеленский АҚШдан Украинага ажратилаётган ҳарбий ёрдамнинг тақдири ҳақида расмий маълумот олиш бўйича мамлакатнинг турли идоралар раҳбарларига топшириқ берди. Бу ҳақда у кеча, 4 март куни халққа йўллаган мурожаатида сўз очди. 

“Мен Украина Мудофаа вазирига, разведка раҳбарларига ва дипломатларимизга АҚШдаги ҳамкасблари билан боғланиб, расмий маълумот олишни топширдим. Одамлар тахмин қилишга мажбур бўлмаслиги керак. Украина ва Америка ўзаро ҳурматга асосланган аниқ позицияни билишга лойиқ, айниқса, тўлиқ ҳажмдаги уруш давом этаётган бир пайтда, гап инсон ҳаётини ҳимоя қилиш ҳақида кетаётганида”, деди Зеленский.

Унинг қўшимча қилишича, сўнгги ҳафталарда Украина турли хил сигналлар олган, шунингдек, ёрдам тўхтатилган ҳолатлар ҳам бўлган.

“Энергетика соҳасидаги гуманитар ёрдам тўхтатилган эди. Январь ойининг охирида эса ҳарбий ёрдам ҳам тўхтатилган, лекин ўшанда муаммо тезда ҳал қилинган эди. Биз хавфларни олдиндан кўрганмиз. Шу сабабли ҳарбий ва махсус хизматларимиз ҳар қандай вазиятга қарши курашиш учун зарур чораларни ишлаб чиқди. Ҳозир 2022 йил эмас. Энди бизнинг барқарорлигимиз анча юқори. Бизда ҳимоя воситалари бор. Аммо биз учун Америка билан оддий, шериклик муносабатлари урушни ҳақиқатда тугатиш йўлида муҳим аҳамиятга эга. Ҳеч биримиз чексиз урушни истамаймиз”, деди Украина Президенти.

Зеленский Украина доимо Американинг кўрсатган ёрдами учун миннатдор эканини ва бу ёрдам аллақачон Европада хавфсизликнинг заиф асосларини сақлаб қолишда муҳим роль ўйнаётганини таъкидлаган.

“Бу фақат бизнинг мамлакатимиз ҳақида эмас. Бу бутун Европа ҳақида. Биз конструктив ҳамкорлик, шериклик муносабатларига интиламиз. Оқ уйда бўлиб ўтган воқеалар ўрнига бизнинг музокараларимиз бўлиши керак эди, бундай ҳолатга фақат афсус қилиш мумкин. Лекин, олдинга интилиш учун куч топиш керак, бир-биримизни ҳурмат қилиш зарур, худди биз ҳар доим Америка, Европа ва барча ҳамкорларни ҳурмат қилганимиз каби. Ва биргаликда ҳаракат қилиб, тинчликка эришиш учун қўлимиздан келганини қилишимиз керак. Украинани бу йўлда қўллаб-қувватлаётган барчага миннатдорчилик билдираман”, деди Зеленский.
 

Қайд этиш жоиз, ўтган куни АҚШ Президенти Дональд Трамп Зеленский билан можародан бир неча кун ўтиб, Украинага ҳарбий ёрдамни тўхтатиш ҳақида буйруқ берганини эълон қилганди.

Эслатиб ўтамиз, 28 февраль куни Зеленский Вашингтонга бориб, Трамп билан Россия билан сулҳ ва фойдали қазилмалар бўйича келишув юзасидан музокаралар ўтказмоқчи эди. АҚШ Президенти уни Оқ уй остонасида “бугун ажойиб кийинибсиз”, дея ҳазил билан кутиб олди.

Музокаралардан олдин бўлиб ўтган матбуот анжуманида Трамп, Зеленский ва Вэнс ўртасида кескин баҳс юзага келди. Трамп Украинани “Учинчи жаҳон уруши билан ўйнашаётганликда” айблади.

Кейинчалик, музокаралар ва уларнинг натижасига бағишланган матбуот анжумани бекор қилинди, Украина делегацияси Зеленский билан бирга Оқ уйни муддатидан аввал тарк этди.

Кейинроқ Зеленский баёнот берди, Оқ уй эса Украинага ҳарбий ёрдамни молиялаштиришни тўхтатишини эълон қилди.

Ғарб ОАВ маълумотларига кўра, Трамп администрацияси Украинадан очиқ узр сўрашни кутаётганини норасмий тарзда билдирган.

Шу билан бирга, Трамп яна бир бор Зеленскийни танқид қилиб, ижтимоий тармоқларда пост эълон қилди. АҚШ Президенти ўз постида “Зеленский тинчлик истамайди, у фақат Америка ёрдамидан фойдаланмоқда”, дея ёзди.

Ҳозирча европалик етакчиларнинг аксарияти АҚШнинг Украинага ҳарбий ёрдамни тўхтатиш қарорини изоҳлашдан ўзини тийган, фақат Полша ва Чехия Бош вазирлари бу масалада ўз позицияларини аниқ ифодалади.

Украина Бош вазири Денис Шмигаль эса АҚШ ёрдамининг тўхтатилмаганини таъкидламоқда.

Кейинроқ, Трамп билан можародан сўнг, Зеленский Х ижтимоий тармоғида пост эълон қилиб, Украина нодир ер металлари бўйича келишувга тайёрлигини маълум қилди.