“У бугун чиройли кийинибди”. Трамп Оқ уйда Зеленскийни кутиб олди (видео)

Украина Президенти Владимир Зеленский бугун, 28 февраль куни АҚШ Президенти Дональд Трамп билан музокаралар ўтказиш учун Оқ уйга борди. Томонлар фойдали қазилмалар бўйича келишув имзолаши кутилмоқда. Бу ҳақда CNN хабар берди.

Телеканалга кўра, икки давлат раҳбарлари фақат табиий ресурслар бўйича битимни эмас, балки АҚШнинг Украинадаги урушни тўхтатиш бўйича ҳаракатларини ҳам муҳокама қилади.

Трамп журналистларнинг икки етакчи бугун келишув имзолайдими, деган саволига жавоб бермаган. Бироқ у Зеленский билан қўл сиқиб кўришар экан, ҳазиломуз тарзда “Украина етакчиси бугун чиройли кийинибди”, деган.

Журналистларнинг қайд этишича, ушбу келишув АҚШга Украинадаги ўзлаштирилмаган минералларга осон кириш имконини бериши, бунинг эвазига эса Киев инвестициялар ва хавфсизлик бўйича аниқ кафолатларни олишга умид қилаётгани айтилмоқда.

“Битим тафсилотлари ҳозирча номаълум, бироқ таҳлилчиларга кўра, у кенгроқ тинчлик музокараларига олиб келиши мумкин”, дейилади хабарда.

УНИАНга кўра, АҚШ ва Украина раҳбарлари аввал Оқ уйнинг Овал офисида учрашиб, оммавий ахборот воситалари учун қисқа баёнот беради, сўнг ишчи тушлик давомида ҳукумат хонасида музокараларни давом эттиради. Кейинчалик, Оқ уйнинг шарқий қанотида икки давлат раҳбарлари тикланиш инвестиция фонди қоидалари ва шартларини белгиловчи икки томонлама келишув имзолаш маросимида иштирок этади.

Эслатиб ўтамиз, аввалроқ Дональд Трамп Буюк Британия Бош вазири Кир Стармер билан учрашувда Украинада ўт очишни тўхтатиш “тез орада” тўхташи ёки тинчлик “ҳеч қачон” ўрнатилмаслигини айтган эди. Америка етакчисининг сўзларига кўра, “тинчлик сари олға силжиш” бугун, 28 февраль куни у украиналик мавқедоши Владимир Зеленский билан минерал ресурслар бўйича учрашувда давом этади.