“Ювентус”нинг ёзги трансфер мақсадлари кимлар?

Европа футболида мавсум тугашига икки ойдан камроқ вақт қолди ва айни пайтда ёзги трансфер ойнаси учун клублар ўз трансферларини режалаштиришни бошламоқда. Шу қаторда Италиянинг 36 карра чемпиони “Ювентус” ҳам жуда қиммат бўлмаган трансфер имкониятларини қидирмоқда ва бир қатор футболчилар билан алоқага чиқишга ҳам улгурди.

“Кекса Синиора” Саудия Арабистонидаги илк мавсумида “Ал Ҳилол” сафида ўзини тўлиқ кўрсата олмаган ва ёзда Европага қайтиши мумкин бўлган Дарвин Нунес бўйича араб жамоасига сўров юборган. “ Бьянконери” ўтган ёздаёқ Лукка билан шартнома имзолашдан олдин “Наполи” эътиборида бўлган уругвайлик ҳужумчи трансферига қизиқиб кўрганди, аммо саудияликлар фаолроқ бўлиб ҳужумчини “илиб” кетганди. Айни вақтда ҳужумчи легионерлар лимити тўлиб қолгани боис жамоасининг бу мавсумдаги чемпионат ўйинларида иштирок этолмайди. “Ал Ҳилол” билан 2028 йилнинг ёзига қадар шартномаси бўлган Нунеснинг айни вақтдаги бозор қиймати 25 миллион еврони ташкил қилади.

Туринликларнинг диққат билан кузатаётган футболчилари орасида Бернарду Силва ҳам бор. Португалиялик футболчининг “Манчестер Сити” билан шартномаси ушбу мавсум сўнгида якунига етади ва клуб аллақачон уни келажакдаги режаларига кирмаслигини маълум қилган. Шундай қилиб мавсум охирида уларнинг йўллари ажралади. Португалияликка “Ювентус”дан ташқари ҳозирда “Барселона”, Саудия Арабистони Про-лигаси ва MLS’нинг бир қатор клублари қизиқиш билдирмоқда ва унга Англиядаги маошидан ҳам кўпроқ маош таклиф қилишга тайёр. Маълумот ўрнида, Силванинг бозор қиймати 15 миллион 600 минг фунт стерлингни ташкил қилади. 

Шунингдек, “Ювентус” “Борнмут”нинг аргентиналик марказий ҳимоячиси Маркос Сенеси билан аллақачон алоқа ўрнатган ва яна “Лейпциг”нинг австриялик футболчиси Хавер Шлагерни ҳам ўз шорт-листига киритди. Аслида жамоа Шлагерни январь ойидаёқ сотиб олмоқчи эди, аммо трансфер учун сўралган 10 миллион евро туринликларга тўғри келмаганди. Энди клуб ёзга бориб шартномаси тугайдиган футболчини текинга қўлга киритишга уриниб кўради. Бундан ташқари, жамоа ушбу мавсум сўнгида клублари билан шартномаси якунига етадиган “Ал-Аҳли” ярим ҳимоячиси Франк Кесси, “Рома” вакили Зеки Челик ва “Барселона” ҳужумчиси Левандовскини ўз сафида кўришни хоҳламоқда.

Рамазон Усанов