Европа чемпиони Қозоғистон терма жамоаси бош мураббийи бўлди

Нидерландиялик мутахассис, 1988 йилги Европа чемпиони Жон ван’т Схип Қозоғистон миллий терма жамоасининг янги бош мураббийи бўлди. Бу ҳақда Қозоғистон футбол федерацияси (ҚФФ) расмий сайти хабар берди.

Маълум қилинишича, 62 ёшли мутахассиснинг тайинлови ҚФФ Ижроия қўмитаси томонидан тасдиқланганидан кейин расман кучга киради. Яқин кунларда бўлиб ўтадиган йиғилишдан сўнг у билан шартнома имзоланиши кутилмоқда.

Жон ван’т Схип футболчилик фаолияти давомида “Аякс” ва “Женоа” клублари сафида тўп сурган. Шунингдек, у Нидерландия миллий терма жамоаси билан 1988 йилги Европа чемпионати ғолибига айланган.

Мураббийлик фаолияти давомида ван’т Схип “Твенте”, “Аякс”, “Мельбурн Ҳарт”, “Гвадалахара”, “Мельбурн Сити” клублари, шунингдек, Греция ва Арманистон миллий терма жамоаларини бошқарган. У Арманистон терма жамоасини 2025 йил августида тарк этган.

Қозоғистон терма жамоасида у 2025 йил сентябридан буён бош мураббий сифатида фаолият юритиб келаётган Талғат Байсуфинов ўрнини эгаллайди.