Елена Зеленская Эмина Эрдўған билан учрашди  

Бугун, 18 февраль куни Туркиянинг биринчи хоними Эмина Эрдўған расмий ташриф билан мамлакатда бўлиб турган Украина Президенти Владимир Зеленскийнинг турмуш ўртоғи Елена Зеленская билан учрашди. Бу ҳақда Туркиянинг биринчи хоними ва Украина раҳбарининг турмуш ўртоғи ўз Instagram саҳифаларида ёзиб қолдирди.

Маълум қилинишича, давлат раҳбарларининг рафиқалари Украинанинг Одесса шаҳридаги 3-сонли ихтисослаштирилган психоневрологик болалар уйидан 34 нафар ногиронлиги бўлган етим болани Анқарадаги “Сонечко” уйига эвакуация қилишда иштирок этган.

“Бу ерда улар учун махсус “Болалар уйи” яратилган. Улар ўқиш ва ривожланиш учун қулай синф хоналари, ётоқ хоналари билан жиҳозланган, тиббий ёрдам ва реабилитация билан тўлиқ таъминланган. Барча харажатларни Туркия томони ўз зиммасига олди”, дейилади хабарда.

Шунингдек, Елена Зеленская ўз саҳифасида асли украиналик бўлган 10 нафар болани кўрганини ёзган.

“Бугун Туркияга ташрифим чоғида меҳмондўст турклар қарамоғида қолган 10 нафар болани бориб кўрмоқдаман. Кимдир даволаниш ва ҳатто яхши ҳаёт ва ривожланиш учун зарур бўлган операцияларни ўтказади”, дейди Украина биринчи хоними.

Шу билан бирга, Елена Зеленская Туркияга миннатдорлик билдиришини қўшимча қилган.

“Туркияга ва шахсан Эмина хонимга бу болаларнинг хавфсизлиги ва кутиб олишгани учун миннатдорлик билдираман. Бу самарали ёрдам”, дея ёзиб қолдирган Зеленская.

Эслатиб ўтамиз, бугун, 18 февраль куни Туркия Президенти Ражаб Тойиб Эрдўған Украина раҳбари Владимир Зеленский билан учрашганди. Ражаб Тойиб Эрдўған Анқарада музокаралар бошланишидан аввал украиналик мавқедошини президентлик мажмуаси кираверишида кутиб олган.