Екатерина Биволнинг суди қачон бўлиши айтилди

Россиялик профессионал боксчи Дмитрий Биволнинг собиқ рафиқаси Екатерина Биволга нисбатан Россияда этник нафратни қўзғатиш айблови билан суд жараёни жорий йилнинг 29 январь куни бошланади. Бу ҳақда “Вечерний Бишкек” хабар берди.

Нашр маълумотларига кўра, суд мажлиси Санкт-Петербург шаҳридаги Ленинский туман судида бўлиб ўтади. Тергов ўтган йилнинг октябрь ойида Екатерина Бивол томонидан Telegram-каналида жойлаштирилган видео сабаб бошланган. Хабарларга кўра, Экстремизмга қарши кураш маркази мутахассислари экспертиза натижасида видеода қирғиз ва қозоқ халқи вакилларининг шаъни ва қадр-қимматини камситувчи баёнотлар мавжудлигини аниқлаган.

Мазкур ҳолат юзасидан Екатерина Биволга нисбатан маъмурий иш қўзғатилган. Ушбу модда катта миқдордаги жарима ёки маъмурий қамоқ жазоларини назарда тутади.

Эслатиб ўтамиз, аввалроқ Қозоғистон Ички ишлар вазирлиги Дмитрий Биволнинг собиқ рафиқасини мамлакат ҳудудига экстрадиция қилиш масаласини кўриб чиқаётгани ҳақида хабар берган эди. 2025 йилнинг октябрь ойида Қозоғистон ИИВ Екатерина Биволга нисбатан жиноий иш қўзғатилганини тасдиқлади. Шундан сўнг у қидирувга берилган эди.  

Бундан ташқари, Екатерина Бивол Қирғизистонда ҳам қидирувда бўлган. У ерда унга нисбатан Жиноят кодексининг 330-моддаси (ирқий, этник, миллий ёки минтақалараро адоватни (низони) қўзғатиш) бўйича жиноий иш очилган.

Оммавий ахборот воситалари хабарига кўра, терговга Екатерина Биволнинг автомобиль бошқараётган пайтда қирғизлар ва бошқа миллат вакиллари ҳақида ҳақоратли сўзлар ишлатгани акс этган видео сабаб бўлган.