ЕИ Трамп ва Путиннинг учрашувида Стубб ҳам бўлишини таклиф қиляпти

Европа мамлакатлари раҳбарлари АҚШ Президенти Дональд Трамп ва Россия Президенти Владимир Путиннинг Будапештда бўлиб ўтиши кутилган учрашувида иштирок этишга интилмоқда. Бу ҳақда манбаларига таяниб, “Bloomberg” агентлиги хабар берди.

Агентликнинг икки манбаси таъкидлашича, Европа Иттифоқи мамлакатлари раҳбарлари “Путиннинг Трампга таъсирига қарши тура олиш” учун бирлашиши лозим. Яна бир манба эса Венгрияга сафар қилиш учун муносиб номзод сифатида Финляндия Президенти Александр Стуббни тилга олган.

Эслатиб ўтамиз, 16 октябрь куни Путин ва Трамп йил бошидан буён саккизинчи марта телефон орқали суҳбатлашганди. 2,5 соат давом этган ушбу мулоқотдан сўнг, Россия Президенти ёрдамчиси Юрий Ушаков маълум қилишича, Москва ва Вашингтон яқин орада икки давлат етакчиларининг янги учрашувини тайёрлашни бошлайди. Унга кўра, янги учрашув Будапештда бўлиши мумкин – бу ғояни АҚШ Президенти илгари сурган, Россия Президенти эса қўллаб-қувватлаган.