Путиннинг қизи Зеленскийдан ўғилли бўлди – ОАВ

Россия Президенти Владимир Путиннинг кенжа қизи Катерина Тихонова ўғил фарзанд дунёга келтирди. Унга Адриан исми қўйилди. У Россия Президентининг тўртинчи набираси бўлиши мумкин. Бу ҳақда ФҲДЁнинг сизиб чиққан ёзувларига таяниб, “Агентство” хабар берди.

Қайд этилишича, болакай 2025 йил 15 август куни Москвада туғилган. Унинг эҳтимолий отаси – Бавария давлат балетининг собиқ раҳбари Игорь Зеленский. Болага онасининг фамилияси – Тихонов берилган.

Сизиб чиққан ҳужжатларга кўра, Адриан Игоревич Тихонов Президент ишлар бошқармасининг Марказий клиник шифохонасида туғилган. Унга туғилганлик тўғрисидаги гувоҳнома жорий йилнинг 10 июль куни берилган. Нашрнинг тахмин қилишича, деярли бир йиллик кечикиш Путин оиласининг бола туғилганини яшириш истаги билан боғлиқ бўлиши мумкин. Тихонова туғруқдан олдин оммавий тадбирларда асосан масофавий тарзда иштирок этган. Туғруқдан бир неча ой олдин у Петербург халқаро иқтисодий форумида видеоалоқа орқали нутқ сўзлаган.

“The Moscow Times”нинг ёзишича, Катерина Тихонова 2017 йилдан буён Игорь Зеленский билан учрашиб юради. Ўшанда Зеленский Мюнхендаги Бавария давлат балетига раҳбарлик қилган. “Важные истории”НИНГ аниқлашича, икки йил ичида Тихонова Мюнхенга 50 мартадан ортиқ учган, шунингдек, Зеленский билан бирга саёҳат қилган. 2017 йил декабрь ойида Тихонованинг Эльза исмли қизи туғилган. “Проект”нинг ёзишича, қизалоқ туғилганида отасининг фамилиясини олган бўлса-да, хорижий сафарлар учун онасининг фамилияси ёзилган паспортдан фойдаланган. Бунга қадар Катерина Путиннинг эски дўсти ва “Озеро” кооперативи бўйича ҳамкори Николай Шамаловнинг ўғли, бизнесмен Кирилл Шамалов билан никоҳда бўлган. 
 
Путин аввалроқ набиралари ҳақида гапирган. Хусусан, 2017 йил июнь ойида у иккинчи набираси туғилганини маълум қилган. Иккала ўғил бола ҳам унинг тўнғич қизи Мария Воронцованинг фарзандлари. Роман 2012 йил август ойида нидерландиялик тадбиркор Йоррит Фаассендан, Андрей эса 2017 йил апрель ойида “Новатэк” менежери Евгений Нагорнийдан туғилган. 2025 йил июнь ойида Президент илк бор Пекиндан келган тарбиячиси бор набира қизи ҳақида сўзлаб берган. Тахминларга кўра, у Эльза ҳақида гапирган.

Путиннинг собиқ гимнастикачи Алина Кабаевадан бўлган фарзандлари ҳам бошқа фамилиялар остида яшайди. “Досье” маркази маълумотларига кўра, уларнинг 2015 ва 2019 йилларда туғилган Иван ва Владимир исмли икки ўғли бор. Болалар Спиридонов фамилиясини олган. Эҳтимол, бу фамилия Президентнинг бобоси Спиридон Путиннинг исмидан олинган. Путиннинг Светлана Кривоногихдан бўлган тахминий никоҳсиз қизи Елизавета эса Руднова фамилиясини олган бўлиб, ижтимоий тармоқларда Луиза Розова тахаллусидан фойдаланган.