ЕИ Россияга қарши 20-санкциялар пакетини тасдиқлади

Европа Иттифоқи Кенгаши Россияга қарши 20-санкциялар пакетини ҳамда Киевга 90 миллиард евро миқдорида маблағ ажратилишини тасдиқлади. Бу ҳақда бугун, 23 апрель куни Еврокенгаш раҳбари Антониу Кошта Х ижтимоий тармоғида маълум қилди.

“ЕИнинг Украинада адолатли ва барқарор тинчликка эришиш стратегияси икки устунга таянади: Украинани мустаҳкамлаш ва Россияга босимни кучайтириш. Бугун биз ҳар икки йўналишда олдинга силжидик: Украина учун 2026–2027 йилларга мўлжалланган молиявий ва ҳарбий ёрдамни таъминловчи 90 миллиард евролик кредитни блокдан чиқардик ҳамда Россияга қарши 20-санкциялар пакетини қабул қилдик”, дейилади Еврокенгаш раҳбари баёнотида.

Европа Иттифоқи Кенгашининг расмий сайтида қайд этилишича, бугун Кенгаш 2025 йил декабрида келишилган, Украинага бериладиган 90 миллиард евролик кредитнинг асоси бўлган сўнгги муҳим қонунчилик ҳужжатини қабул қилган. Бу қадам Еврокомиссияга тўловларни 2026 йилнинг иккинчи чорагида бошлаш имконини беради.

Хабар қилинишича, кредит мамлакатнинг 2026 ва 2027 йиллардаги энг долзарб бюджет эҳтиёжларини ҳамда мудофаа-саноат салоҳияти эҳтиёжларини қоплашга ёрдам беради. Кенгашнинг мазкур ижроия қарори барча 24 та аъзо давлат томонидан қўллаб-қувватланган. 

Эслатиб ўтамиз, жорий йилнинг февраль ойида Венгрия Европа Иттифоқининг Украинага 90 миллиард евро миқдорида кредит ажратиш тўғрисидаги қарорини тўсиб қўйганди. 12 апрель куни бўлиб ўтган сайловлар натижаларига кўра Венгрия парламентида конституциявий кўпчиликни (учдан икки қисм ўринни) қўлга киритган Петер Мадьяр ва унинг партияси Украинанинг Европа Иттифоқидан кредит олишига қўйилган блокни бекор қилди.