Яссин Буну ЖЧда янги рекорд ўрнатди

Марокаш миллий терма жамоасининг дарвозабони Яссин Буну 2026 йилги Жаҳон чемпионатининг чорак финалида Франция ҳужумчиси Килиан Мбаппенинг пенальти зарбасини қайтариб, мундиаллар тарихидаги энг яхши кўрсаткичлардан бирига эришди. Бу ҳақда “Opta” портали хабар берди.

Бостонда бўлиб ўтган учрашувнинг 28-дақиқасида белгиланган пенальтини қайтарган Буну турнирнинг энг сермаҳсул тўпурарларидан бири бўлган Мбаппени гол уриш имкониятидан маҳрум қилди.

Ушбу сейв Бунунунг Жаҳон чемпионатлари доирасида қайтарган тўртинчи пенальтиси бўлди. Бу ҳисобга пенальтилар сериясида қайтарилган зарбалар ҳам киритилган.

Шу тариқа, марокашлик посбон ушбу кўрсаткич бўйича Ҳаральд Шумахер (Ғарбий Германия), Серхио Гойкочеа (Аргентина), Икер Касильяс (Испания), шунингдек, хорватиялик Даниел Субашич ва Доминик Ливакович билан тенглашди.

“Opta” статистикасига кўра, Буну Жаҳон чемпионатларида дуч келган тўққизта пенальтининг фақат иккитасида гол ўтказиб юборган. Тўрттасини қайтарган бўлса, яна учтасида рақиблар нишонни аниқ ололмаган.

Килиан Мбаппе учун эса ушбу вазият Жаҳон чемпионатлари тарихидаги илк пенальти хатоси бўлди. Француз ҳужумчиси бунга қадар мундиалларда тепган учала пенальтисини ҳам аниқ амалга оширган эди.