Японияда тайфун оқибатида 4 киши ҳалок бўлди, 6 киши бедарак йўқолган

Японияда “Dujuan” тайфуни келтирган кучли ёмғир ва шамоллар оқибатида кўчкилар юз бериб, 4 киши ҳалок бўлди, яна 6 киши бедарак йўқолди. Бу ҳақда BBC хабар берди.

Қайд этилишича, тайфун Токио ва унинг атрофидаги префектураларда кучли ёмғирлар ва вайронкор шамолларни келтириб чиқарган. Канагава ва Чиба префектураларида кўчкилар содир бўлган.

Канагава префектурасининг Ёкосука шаҳрида 60 ёшлар атрофидаги аёл кўчки оқибатида уйи ичида қолиб кетган. Қутқарувчилар унинг жасадини топган. Чиба префектурасида эса 50 ёшлар атрофидаги эркак кўчки ҳудудида вайроналарни тозалаш вақтида оғир техника билан бирга бамбукзор ичига тушиб кетган. У шифохонага олиб борилган, бироқ кейинчалик вафот этган.

Тайфун энг кучайган пайтда Япония расмийлари ҳаёт учун “яқин хавф” мавжудлигидан огоҳлантириб, 1,9 миллион кишини бошпаналарга кўчишга чақирган. Бугун, 22 сентябрь куни бўрон мамлакатнинг шарқий соҳилларидан узоқлашгани сабаб эвакуация бўйича кўрсатмаларнинг аксарияти бекор қилинган.

“Dujuan” тайфуни соатига 130 километргача тезликда доимий шамолларни, 194 километргача бўлган кучли шамол тезлигини келтириб чиқарган. Табиий офат оқибатида 50 мингга яқин киши электр таъминотисиз қолган, юзлаб авиақатновлар бекор қилинган.

Тайфун мамлакатдаги беш кунлик байрам кунларига тўғри келган. Шу сабабли айрим тадбирлар, жумладан, “Rock in Japan” мусиқа фестивалининг концертлари ва “Tokyo Game Show” кўргазмасининг бир кунлик дастури бекор қилинган.

Метеорологларнинг қайд этишича, океан сувларининг исиши тайфунлар пайдо бўлганда уларнинг кучини ошириши мумкин. Илиқроқ атмосфера эса кўпроқ намликни ушлаб, кучлироқ ёғингарчиликларга сабаб бўлади.

Эслатиб ўтамиз, аввалроқ Вьетнамнинг шимолий ва марказий ҳудудларида юз берган кучли ёмғир, сув тошқинлари ва кўчкилар оқибатида камида 4 киши ҳалок бўлгани, 16 мингдан ортиқ уй сув остида қолгани ҳақида хабар берилган эди.