Январда ёши 50 дан ошган 117 аёл ва 448 эркак турмуш қурган

Ўзбекистонда жорий йилнинг январь ойида ёши 50 дан ошган 117 нафар аёл ва 448 нафар эркак турмуш қурган. Бу ҳақда Давлат статистика қўмитаси Матбуот хизмати маълум қилди.

Статқўмга кўра, январь ойида 20 ёшгача никоҳ қуриш бўйича қизларнинг ошиғи олчи бўлган. Ўтган ойда 5 844 нафар 20 ёшгача бўлган қиз турмушга чиққан бўлса, бор-йўғи 181 та 20 ёшгача бўлган йигитчалар куёв бўлган. 

Йигитлар ва қизлар орасида оила қуриш ёшининг 20-30 ёш оралиғи энг яхши давр сифатида танланаётганини қуйидаги маълумотдан ҳам кўриш мумкин. Ўтган ой 20-30 ёш оралиғидаги 12 230 та қиз ва 16 374 та йигит оила қурган. 

Ўттиздан ўтган ўтин, қирққа чиққан қирчиллаган деган гапларни қўйинг. Турмуш қуриш борасида бу ёшдагилар ҳам чакки эмас. 31-40 ёш оралиғидаги 1 872 аёл, 2 618 эркак январда ўз жуфтини топган.

41-50 ёш орасида турмуш қурганлар эса жами 1 132 нафар бўлиб, уларнинг 365 нафарини аёллар, 767 нафарини эркаклар ташкил этмоқда. 

Муҳаббат ёш танламайди. Шу маънода ўтган ойда 51 ва ундан катта ёшдаги 117 нафар аёл ва 448 эркак турмуш қуришга жазм қилган. 

Маълумот учун, 2021 йилда Ўзбекистонда 305 082 та никоҳ ҳолатлари қайд этилган. Никоҳдан ажралиш ҳолатлари эса 39 227 тани ташкил қилган.