Янгийўл тумани ҳокими ҳам ишдан олинди

Бугун, 14 июль куни Одилжон Атауллаев Тошкент вилоятининг Янгийўл тумани ҳокими лавозимидан озод этилди. Бу ҳақда вилоят ҳокимлиги хабар берди.

Қайд этилишича, Янгийўл туманида Халқ депутатлари туман Кенгашининг навбатдан ташқари сессияси ўтказилган. Сессияда Тошкент вилояти ҳокими Зоир Мирзаев туманни ижтимоий-иқтисодий ривожлантириш бўйича белгиланган вазифалар ижроси юзасидан танқидий-таҳлилий маъруза қилган.

Сессияда ташкилий масала кўрилган ва туман ҳокими лавозимида ишлаб келган Одилжон Қосимович Атауллаев эгаллаб турган лавозимидан озод этилган.

Зоир Мирзаев Янгийўл тумани ҳокими лавозимига шу пайтга қадар Вазирлар Маҳкамасида масъул вазифада ишлаб келаётган Санъат Шокирович Жуманиёзов номзодини тавсия қилган. Халқ депутатлари туман Кенгаши депутатлари томонидан Санъат Жуманиёзов Янгийўл тумани ҳокими этиб тасдиқланган.

Эслатиб ўтамиз, аввалроқ Насрулло Бобоев Тошкент вилоятининг Бекобод шаҳри ҳокими лавозимидан озод этилгани ва унинг ўрнига Наримонжон Исмоилов тасдиқлангани ҳақида хабар берилган эди.