“Янгилигим бор”. Трамп Эронда намойишчилар ортиқ қатл этилмаслигини айтди (видео)

Кеча, 14 январь куни АҚШ Президенти Дональд Трамп Эрон бўйлаб намойишларга қарши бостириш жараёнида одамлар ўлдирилиши камаяётганини ва бундан кейин намойишчиларнинг қатл этилиши бўйича режалар бўлмаслигига ишонишини айтди. Бу ҳақда у Овал офисда журналистлар билан суҳбатда гапирган. 

“Эрон бўйича бир қанча янгиликларим бор. Жуда муҳим манбаларнинг айтишича, ўлдиришлар тўхтатилган ва намойишчилар энди қатл этилмайди. Бугун кўплаб қатл этишлар бўлиши керак эди, лекин улар амалга ошмайди. Биз бунинг сабабини билиб оламиз. Мен, албатта, билиб оламан”, деган у. 

Трамп Эронда тартибсизликлар юзага келгандан бери намойишчиларни қўллаб-қувватлаш бўйича бир неча марта таҳдид қилган. Шундан келиб чиқиб, мутахассислар АҚШнинг Эронга зарба бериши эҳтимоли ошганини айтмоқда. Шу билан бирга, Трампнинг ўзи ҳам ҳарбий аралашувни тўлиқ инкор этмаган. 

Бироқ баъзи экспертлар ва минтақавий дипломатларнинг огоҳлантиришича, ҳарбий аралашув норозиликларни бостиришни кучайтириши, намойишчиларга нисбатан чораларни кескинлаштириши ва Эроннинг АҚШ базаларига ракета ҳужумларини қўзғатиши мумкин.

Айрим мутахассислар эса АҚШ зарбалари ҳукуматнинг тезроқ қулаши ва 90 миллион аҳоли яшайдиган мамлакат бўйлаб тартибсизликлар юзага келишига, мамлакатда истиқомат қилувчи курд ва белуж халқларининг қўзғолонига туртки беришига ва Эроннинг ядровий ҳамда ракета дастурлари хавф остида қолишига сабаб бўлиши мумкинлигини айтмоқда.

Эрон расмийларининг билдиришича, намойишлар бошлангандан бери 2 000 дан ортиқ одам ҳалок бўлган. Инсон ҳуқуқлари ташкилоти эса ўлимлар сонини 2 600 дан ошиқ деб баҳоламоқда. Кўплаб экспертлар бу рақамлар бундан ҳам юқори эканини айтмоқда.

Эслатиб ўтамиз, аввалроқ Эрон ҳукумати норозилик намойиши иштирокчиларини осиб қатл этишни режалаштирмаётганини ва бундай сценарий ҳатто кўриб ҳам чиқилмаслигини айтганди.