Янгиланган FIDE рейтингида ўзбек шахматчилари нечанчи ўринни эгаллади?

Жаҳон шахмат федерацияси (FIDE) декабрь ойи учун рейтингни янгилади ва рейтингдан 5 нафар ўзбекистонлик шахматчи ўрин олди. Бу ҳақда FIDE матбуот хизмати хабар берди.

Рейтингга кўра, янгиланган рейтингда кучли 100 ликдан 5 нафар ўзбекистонлик гроссмейстер ўрин олди. Рейтингда Нодирбек Абдусатторов 2768 очко жамғарган ҳолда 6-ўринни эгаллади. Абдусатторов олдинги ой ҳам шу ўринда қайд этилганди. Бу ойда унинг рейтинг очколари 9 тага камайган.

Шунингдек, Жавоҳир Синдоров 2692 очко билан 37-ўринга кўтарилди. Ноябрь ойида у 46-ўриндан жой олган эди. Рустам Қосимжонов 2683 очко жамғариб 45-ўринни, 2670 рейтинг очкога эга Шамсиддин Воҳидов 52-ўринни, 2659 очкоси бор Нодирбек Ёқуббоев 67-ўринни эгаллади. Ёқуббоев ноябрь ойида 62-ўринда эди.

Бир неча ой ёшлар ўртасидаги жадвалда етакчилик қилган Нодирбек Абдусатторов 2025 йилда 21 ёшга тўлиши муносабати билан рейтингдан чиқарилди. Кучли учликдан ўзбекистонлик Жавоҳир Синдоров ўрин олди. Яна бир Ўзбекистон вакили Муҳриддин Мадаминов 31-ўринда жойлашди. Муҳаммадзоҳид Суюнов 68-ўринда қайд этилди.