Yangilangan FIDE reytingida o‘zbek shaxmatchilari nechanchi o‘rinni egalladi?

Jahon shaxmat federatsiyasi (FIDE) dekabr oyi uchun reytingni yangiladi va reytingdan 5 nafar o‘zbekistonlik shaxmatchi o‘rin oldi. Bu haqda FIDE matbuot xizmati xabar berdi.

Reytingga ko‘ra, yangilangan reytingda kuchli 100 likdan 5 nafar o‘zbekistonlik grossmeyster o‘rin oldi. Reytingda Nodirbek Abdusattorov 2768 ochko jamg‘argan holda 6-o‘rinni egalladi. Abdusattorov oldingi oy ham shu o‘rinda qayd etilgandi. Bu oyda uning reyting ochkolari 9 taga kamaygan.

Shuningdek, Javohir Sindorov 2692 ochko bilan 37-o‘ringa ko‘tarildi. Noyabr oyida u 46-o‘rindan joy olgan edi. Rustam Qosimjonov 2683 ochko jamg‘arib 45-o‘rinni, 2670 reyting ochkoga ega Shamsiddin Vohidov 52-o‘rinni, 2659 ochkosi bor Nodirbek Yoqubboyev 67-o‘rinni egalladi. Yoqubboyev noyabr oyida 62-o‘rinda edi.

Bir necha oy yoshlar o‘rtasidagi jadvalda yetakchilik qilgan Nodirbek Abdusattorov 2025 yilda 21 yoshga to‘lishi munosabati bilan reytingdan chiqarildi. Kuchli uchlikdan o‘zbekistonlik Javohir Sindorov o‘rin oldi. Yana bir O‘zbekiston vakili Muhriddin Madaminov 31-o‘rinda joylashdi. Muhammadzohid Suyunov 68-o‘rinda qayd etildi.